Thu. Oct 1st, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ສຳເລັດກອງປະຊຸມຄົບຄະນະບໍລິຫານງານສະຫະພັນກຳມະບານແຂວງວຽງຈັນ ທ້າຍສະໄໝ

1 min read

ສຳເລັດກອງປະຊຸມຄົບຄະນະບໍລິຫານງານສະຫະພັນກຳມະບານແຂວງວຽງຈັນ ທ້າຍສະໄໝ.


ເພຶ່ອປະຕິບັດຕາມມະຕິຕົກລົງຂອງຄະນະປະຈຳພັກແຂວງວຽງຈັນ ສະບັບເລກທີ 192/ຄປພ,ວຈ ລົງວັນທີ 16 ມິຖຸນາ 2020 ວ່າດ້ວຍ: ການອະນຸມັດໃຫ້ສະຫະພັນກຳມະບານແຂວງວຽງຈັນ ເປີດກອງປະຊຸມວິສາມັນຄົບຄະນະບໍລິຫານງານ ທ້າຍສະໄໝ, ໂດຍປະຕິບັດຕາມເນື້ອໃນຈິດໃຈດັ່ງກ່າວ, ໃນຕອນເຊົ້າຂອງວັນທີ 17 ມີຖຸນາ 2020, ທີ່ສະໂມສອນຫ້ອງວ່າການປົກຄອງເມືອງວຽງຄຳ ໄດ້ເປີດກອງປະຊຸມຄົບຄະນະບໍລິຫານງານສະຫະພັນກຳມະບານແຂວງວຽງຈັນ ທ້າຍສະໄໝ ( ສະໄໝທີ VI ) ຂື້ນຢ່າງເປັນທາງການໂດຍການເປັນປະທານຂອງທ່ານ ຄຳພູທອນ ເທບສຸພົມ ກຳມະການພັກແຂວງ ປະທານຄະນະບໍລິຫານງານ ສະຫະພັນກຳມະບານແຂວງວຽງຈັນ,

ເປັນກຽດເຂົ້າຮ່ວມຂອງທ່ານ ທອງສະຫວັນ ວົງສຳພັນ ຄະນະປະຈຳພັກແຂວງ ປະທານແນວລາວສ້າງຊາດແຂວງ ຜູ້ຊີ້ນຳອົງການຈັດຕັ້ງມະຫາຊົນ, ມີຄະນະປະຈຳພັກແຂວງ, ກຳມະການພັກແຂວງ, ມີຄະນະບໍລິຫານງານ 11 ເມືອງ, 03 ສະຫະພັນ 42 ຮາກຖານ ແລະ ຜູ້ແທນສົມບູນ ເຂົ້າຮ່ວມທັງໝົດ 101 ສະຫາຍ, ຍິງ 23 ສະຫາຍ.


ວາລະກອງປະຊຸມ ທ່ານ ຄຳພູທອນ ເທບສຸພົມ ໄດ້ກ່າວເປີດກອງປະຊຸມ ພ້ອມທັງຜ່ານຮ່າງລາຍງານການເມືອງທັງ II ພາກ ຂອງຄະນະບໍລິຫານງານສະຫະພັນກຳມະບານແຂວງ ສະໄໝທີ VI ຕໍ່ກອງປະຊຸມໃຫຍ່ຜູ້ແທນ ສະຫະພັນກຳມະບານແຂວງວຽງຈັນ ສະໄໝທີ VII, ບົດລາຍການເມືອງ ໄດ້ຕີລາຄາສະພາບການຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນ ສະຫະພັນກຳມະບານແຂວງ ຄັ້ງທີ VI ( 2015 – 2020 ), ລະບົບການຈັດຕັ້ງ ຂອງສະຫະພັນກຳມະບານແຕ່ລະຂັ້ນ ນັບແຕ່ຂັ້ນແຂວງຮອດຮາກຖານ ໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງ, ຈຳນວນສະມາຊິກກຳມະບານ ແລະ ຈຳນວນຮາກຖານໄດ້ເພີ່ມຂື້ນຢ່າງຕໍ່ເນື່ອງ, ປະຈຸບັນສະຫະພັນກຳມະບານແຂວງ ປະກອບມີ 11 ສະຫະພັນກຳມະບານເມືອງ, ມີ 03 ສະຫະພັນກຳມະບານພະແນກການ, ມີ 425 ກຳມະບານຮາກຖານ ແລະ ມີຈຳນວນສະມາຊິກກຳມະບານທັງໝົດ 12,054 ສະຫາຍ, ຍິງ 5,777 ສະຫາຍ, ທຽບໃສ່ປີ 2015 ກໍ່ຄືກອງປະຊຸມໃຫຍ່ຄັ້ງທີ VI ຜ່ານມາ ເຫັນວ່າຈຳນວນສະມາຊິກກຳມະບານ ໄດ້ເພີ່ມຂື້ນ 2,128 ສະຫາຍ, ຍິງ 1,332 ສະຫາຍ ເທົ່າກັບ 21,5%, ຖືວ່າໄດ້ລື່ນຄາດໝາຍຂອງແຜນການທີ່ວາງໃວ້ ແລະ ຍັງໄດ້ຂະຫຍາຍການຈັດຕັ້ງກຳມະບານ ເຂົ້າສູ່ຫົວໜ່ວຍແຮງງານເອກະຊົນພາຍໃນ ແລະ ຫົວໜ່ວຍການລົງທຶນຂອງຕ່າງປະເທດທັງໝົດ 14 ແຫ່ງ ມີສະມາຊິກກຳມະບານທັງໝົດ 270 ສະຫາຍ, ຍິງ 68 ສະຫາຍ, ທົ່ວແຂວງວຽງຈັນມີຫົວໜ່ວຍແຮງງານທັງໝົດ 156 ຫົວໜ່ວຍ ມີກຳມະກອນທັງໝົດ 5,015 ສະຫາຍ, ຍິງ 2,515 ສະຫາຍ, ໃນນີ້ມີຫົວໜ່ວຍແຮງງານລັດວິສາຫະກິດ 52 ຫົວໜ່ວຍ, ມີກຳມະກອນ 1,379 ສະຫາຍ, ຍິງ 334 ສະຫາຍ, ພ້ອມທັງວາງທິດທາງໃນຕໍ່ໜ້າ.

ທ່ານ ແສງທຳ ອາໄພຍະລາດ ຮອງປະທານສະຫະພັນກຳມະບານແຂວງ ໄດ້ຂື້ນຜ່ານຮ່າງແຜນພັດທະນາ 5 ປີ ຄັ້ງທີ IV ( 2020 – 2025 ) ຂອງສະຫະພັນກຳມະບານແຂວງ, ໄດ້ກຳນົດຮ່າງແຜນພັດທະນາວຽກງານກຳມະບານ 5 ປີ ຄັ້ງທີ IV ຊຶ່ງປະກອບດ້ວຍ 08 ແຜນງານ ແລະ 28 ໂຄງການເພຶ່ອເປັນເປົ້າໝາຍ ໃນການສ້າງຄວາມເຂັ້ມແຂງຮອບດ້ານ, ພ້ອມທັງເປັນບ່ອນອີງ ໃຫ້ແກ່ການເຄື່ອນໄຫວວຽກງານກຳມະບານແຕ່ລະຂັ້ນ, ແຕ່ລະໄລຍະ ໃຫ້ມີຄວາມຖືກຕ້ອງສອດຄ່ອງທັງເປັນເອກະພາບກັນຢ່າງເປັນລະບົບຄົບຊຸດແຕ່ຂັ້ນແຂວງລົງຮອດຮາກຖານໃນຂອບເຂດທົ່ວແຂວງ.

ທ່ານ ນາງ ບຸນຄ້ຳ ສີສຸທຳ ຮອງປະທານສະຫະພັນກຳມະບານແຂວງ ໄດ້ຂື້ນຜ່ານຮ່າງບົດສຳຫລວດການນຳພາລວມ.

 

ຈາກນັ້ນບັນດາຜູ້ແທນສົມບູນໄດ້ພ້ອມກັນປະກອບຄຳເຫັນໃສ່ຮ່າງບົດລາຍງານການເມືອງທັງ II ພາກ, ແຜນພັດທະນາວຽກງານກຳມະບານ ແລະ ບົດສຳຫລວດການນຳພາລວມຢ່າງກົງໄປກົງມາ.

ໃນກອງປະຊຸມທ່ານ ທອງສະຫວັນ ວົງສຳພັນ ໃຫ້ກຽດໂອ້ລົມຕໍ່ກອງປະຊຸມ ທ່ານໄດ້ກ່າວຍ້ອງຍໍຊົມເຊີຍຕໍ່ຜົນງານ ທີ່ຍາດມາໄດ້ນັ້ນ, ຮຽກຮ້ອງໃຫ້ຜູ້ແທນກອງປະຊຸມຈົ່ງພ້ອມກັນ ປະກອບຄຳຄິດ, ຄຳເຫັນໃສ່ຮ່າງບົດລາຍງານການເມືອງ, ຮ່າງແຜນພັດທະນາ 5 ປີ ຂອງສະຫະພັນກຳມະບານແຂວງ ແລະ ບົດສຳຫລວດການນຳພາລວມໃຫ້ຄົບຖ້ວນ, ເປັນເຈົ້າການໃນການປະຕິບັດວຽກງານສຶກສາອົບຮົມການເມືອງ – ແນວຄິດ, ປະຕິບັດພາລະບົດບາດ, ສິດ, ໜ້າທີ່ຂອງຕົນເອງ ໃຫ້ປະກົດຜົນເປັນຈິງ ກອງປະຊຸມໄດ້ດຳເນີນການປ່ອນບັດທາບທາມບຸກຄະລາກອນຮອບທີ II ໄດ້ສຳເລັດ, ຕາມວາລະກອງປະຊຸມແມ່ນໄດ້ດຳເນີນຊີວິດການເມືອງຂອງຄະນະບໍລິຫານງານ ສະຫະພັນກຳມະບານແຂວງ, ກອງປະຊຸມໄດ້ດຳເນີນໄປເປັນເວລາໜຶ່ງວັນເຕັມ ແລະ ໄດ້ອັດລົງດ້ວຍຜົນສຳເລັດອັນຈົບງາມ.

ຂ່າວ: ໄຊປັນຍາ.

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031