Thu. Jul 9th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ແຂວງ ວຽງຈັນ ປາຖະກະຖາ 2 ວັນປະຫວັດສາດຂອງຊາດ.

1 min read

ພິທີປາຖະກະຖາ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 44 ປີ ແລະ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 99 ປີ ຢູ່ແຂວງວຽງຈັນ ໄດ້ຈັດຂຶ້ນໃນວັນທີ 3 ທັນວາ 2019

ໂດຍໄດ້ເລີ່ມຈາກການວາງກະຕ່າດອກໄມ້ຢູ່ທີ່ອານຸສອນສະຖານ ປະທານ ໄກສອນ ພົມວິຫານ ແລະ ວາງພວງມະລາ ຢູ່ອານຸສາວະລີນັກຮົບນິລະນາມຂອງແຂວງ ໂດຍການນຳພາຂອງ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ.

ພ້ອມທັງໃຫ້ກຽດ ຂຶ້ນປາຖະກະຖາສອງວັນສຳຄັນດັ່ງກ່າວ ຢູ່ທີ່ສະໂມສອນໃຫຍ່ຂອງແຂວງ ເຊິ່ງທ່ານໄດ້ຍົກໃຫ້ເຫັນເຖິງປະຫວັດການກຳເນີດຂອງ 2 ວັນດັ່ງກ່າວ, ໂດຍຍົກໃຫ້ເຫັນການເຕີບໃຫຍ່ຂະຫຍາຍຕົວຂອງການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການຊີ້ນຳນຳພາຂອງພັກ ຕະຫລອດໄລຍະ 44 ປີຜ່ານມາ, ພ້ອມທັງຍົກໃຫ້ເຫັນເຖິງ ພາລະກິດປະຕິວັດ ແລະ ຄຸນສົມບັດສິນທຳປະຕິວັດ ຂອງປະທານ ໄກສອນ ພົມວິຫານ ແລະ ການນຳຜູ້ອື່ນໆ ທີ່ເປັນວິລະບູລຸດຂອງຊາດລາວ ເພື່ອໃຫ້ຄົນຮຸ້ນຫລັງໄດ້ສືບຕໍ່ຜັນຂະຫຍາຍ ແລະ ຮັກສາມູນເຊື່ອໄວ້ໃຫ້ຫມັ້ນຄົງ.

 

ວັນຊາດທີ 2 ທັນວາ ແມ່ນໄດ້ມາຈາກການຕໍ່ສູ້ທີ່ດຸເດືອດ, ເດັດດ່ຽວໜຽວແໜ້ນ, ເຕັມໄປດ້ວຍຄວາມເສຍສະຫຼະຂອງພີ່ນ້ອງປະຊາຊົນລາວບັນດາເຜົ່າຕ່າງໆ ພາຍໃຕ້ການນຳພາຂອງພັກປະຊາຊົນປະຕິວັດລາວ ເຊິ່ງແບ່ງອອກເປັນຫຼາຍບາດລ້ຽວຂອງປະຫວັດສາດຄື: ການຕໍ່ສູ້ຂອງປະຊາຊົນພາຍໃຕ້ການນຳພາຂອງພັກກອມມູນິອິນດູຈີນ, ການຕໍ່ສູ້ລັດທິລ່າເມືອງຂຶ້ນແບບໃໝ່ ພາຍໃຕ້ການນຳພາຂອງພັກປະຊາຊົນປະຕິວັດລາວ ແລະ ການຕໍ່ສູ້ຮອບດ້ານເພຶ່ອຢຶດອຳນາດທົ່ວປະເທດ.

ໃນກາງປີ 1975 ພັກໄດ້ວາງ 3 ບາດຄ້ອນຍຸດທະສາດ ເພຶ່ອຢຶດອຳນາດ: ບາດຄ້ອນທີ1: ແມ່ນໃຊ້ກຳລັງປະຕິວັດໝູນໜີບ, ບາດຄ້ອນທີ2: ແມ່ນໄດ້ປຸກລະດົມມະຫາຊົນລຸກຮື້ຂຶ້ນ ແລະ ບາດຄ້ອນທີ3: ໄດ້ຂົນຂວາຍກຳລັງປະກອບອາວຸດຂອງສັດຕູມາຮ່ວມມືກັບກຳລັງປະຕິວັດ, ຂະບວນລຸກຮຶ້ຂຶ້ນຢຶດອຳນາດໄດ້ລະເບີດຂຶ້ນຢູ່ທຸກໆແຂວງທົ່ວປະເທດ ແລະ ຄັ້ງສຸດທ້າຍ ໃນວັນທີ 23 ສິງຫາ 1975 ຢູ່ນະຄອນຫຼວງວຽງຈັນ.

ມາຮອດວັນທີ 2 ທັນວາ 1975 ໄດ້ໄຂສັງກາດໃໝ່ໃຫ້ເປັນປະເທດສັນຕິພາບ ເອກະລາດ ປະຊາທິປະໄຕ ເອກະພາບ ແລະ ກ້າວເຂົ້າສູ່ສັງຄົມນິຍົມ,ປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ. ການສະເຫຼີມສະຫຼອງວັນຊາດທີ 2 ທັນວາຄົບຮອບ 44 ປີ ເທື່ອນີ້ ແມ່ນຊ່ວງໄລຍະທີ່ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນຊາວແຂວງວຽງຈັນ ພວມສຸມໃສ່ສ້າງຜົນງານເພື່ອຂຳ່ນັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ແລະ ກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງທີ VI ທີ່ຈະໄຂຂຶ້ນໃນຕໍ່ໜ້ານີ້ ຢ່າງເປັນຂະບວນການຟົດຟື້ນ.

ເຂົ້າຮ່ວມໃນພິທີຄັ້ງນີ້ ມີບັນດາຄະນະປະຈຳ, ກຳມະການພັກແຂວງ, ເຈົ້າເມືອງອ້ອມຂ້າງ, ຫົວຫນ້າ, ຮອງຫົວຫນ້າພະແນກການ, ກົມກອງ, ພ້ອມດ້ວຍພະນັກງານຫັລກແຫລ່ງ ພາຍໃນແຂວງເຂົ້າຮ່ວມ.

ຂ່າວ : ບຸນມາ ແກ້ວບຸດດາ
ພາບ : ພູເງິນ ບົວທອງ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

July 2020
M T W T F S S
 12345
6789101112
13141516171819
20212223242526
2728293031