Thu. Jul 9th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ກອງປະຊຸມຄົບຄະນະບໍລິຫານງານພັກເມືອງເຟືອງ ຄັ້ງທີ 3 ສະໄໝທີ VII

1 min read

ກອງປະຊຸມຄົບຄະນະບໍລິຫານງານພັກເມືອງເຟືອງ
ຄັ້ງທີ 3 ສະໄໝທີ VII.


ກອງປະຊຸມຄົບຄະນະບໍລິຫານງານພັກເມືອງເຟືອງ ຄັ້ງທີ 3 ສະໄໝທີ VII ໄດ້ຂຶ້ນ ແລະປິດລົງ ໃນວັນທີ 25 ມິຖຸນາ 2020 ໂດຍການເປັນປະທານຂອງສະຫາຍ ຄໍາເພັດ ຈັນສົມພູ ເລຂາຄະນະບໍລິຫານງານພັກເມືອງເຟືອງ.

ເປັນກຽດເຂົ້າຮ່ວມຂອງ ສະຫາຍ ທອງສະຫວັນ ວົງສຳພັນ ຄະນະປະຈໍາພັກແຂວງ, ປະທານແນວລາວສ້າງຊາດແຂວງວຽງຈັນ, ທັງເປັນຜູ້ຊີ້ນໍາເມືອງເຟືອງ, ມີຄະນະຈັດຕັ້ງແຂວງ, ຄະນະປະຈໍາພັກເມືອງ, ກໍາມະການພັກເມືອງ, ເລຂາຄະນະພັກຮາກຖານ, ພະນັກງານບໍານານ, ເລຂາພັກບ້ານກຸ່ມເທດສະບານ ແລະຫົວໜ້າຫ້ອງການພາຍໃນເມືອງ ເຂົ້າຮ່ວມທັງໝົດ 57 ສະຫາຍ, ຍິງ 8 ສະຫາຍ.


ໃນວະລະກອງປະຊຸມ ສະຫາຍ ຄໍາເພັດ ຈັນສົມພູ ເລຂາຄະນະບໍລິຫານງານພັກເມືອງ ໄດ້ໃຫ້ກຽດຂຶ້ນຜ່ານບົດລາຍງານ ການຈັດຕັ້ງປະຕິບັດວຽກງານຮອບດ້ານ ປະຈໍາ 6 ເດືອນຕົ້ນປີ 2020 ແລະທິດທາງແຜນການ 6 ເດືອນທ້າຍປີ 2020 , ພາກບົດສະຫຼຸບໄດ້ຕີລາຄາເຖິງໝາກຜົນທີ່ໄດ້ຮັບໃນການຊີ້ນໍາໆນຳພາ ຂອງອົງຄະນະພັກເມືອງເຟືອງ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຜູ້ແທນອົງຄະນະພັກເມືອງເຟືອງຄັ້ງທີ VII ເຊີ່ງມີຜົນງານອັນພົ້ນເດັ່ນທີ່ຍາດມາໄດ້ແຕ່ລະຂົງເຂດເຊັ່ນ: ວຽກງານການເມືອງ-ນໍາພາແນວຄິດ ໄດ້ເຮັດໃຫ້ຄະນະພັກແຕ່ລະຂັ້ນ ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ, ທະຫານ, ຕຳຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ໄດ້ເຊື່ອມຊຶມຢ່າງຕໍ່ເນື່ອງ ເປັນຕົ້ນແມ່ນສຸມໃສ່ເຊື່ອມຊຶມ ຄໍາສັ່ງ, ແຈ້ງການຕ່າງໆຂອງຂັ້ນເທິງ ໂດຍສະເພາະ ກ່ຽວກັບການຕ້ານ ແລະສະກັດກັ້ນພະຍາດໂຄວິດ-19 , ດ້ານວຽກງານປ້ອງກັນຊາດ, ປ້ອງກັນຄວາມສະຫງົບ ທົ່ວປວງຊົນຮອບດ້ານ ແມ່ນໄດ້ຮັບການຈັດຕັ້ງປະຕິບັດຢ່າງກວ້າງຂວາງ ເຮັດໃຫ້ເມືອງມີຄວາມສະຫງົບໂດຍພື້ນຖານ, ມີຄວາມເປັນລະບຽບຮຽບຮ້ອຍທົ່ວສັງຄົມ; ດ້ານເສດຖະກິດ-ສັງຄົມ ກໍໄດ້ຮັບການພັດທະນາ ສຸມໃສ່ທໍາການຜະລິດເຂົ້ານາແຊງໃນເນື້ອທີ່ 527 ເຮັກຕຕ່າ ປະຕິບັດໄດ້ 159 ເຮັກຕ່າ, ຜົນຜະລິດ 521,73 ໂຕ່ນ (ຍ້ອນໄພແຫ້ງແລ້ງ), ເນື້ອທີ່ປູກພືລະດູແລ້ງປະຕິບັດໄດ້ 531 ເຮັກຕ່າ ຜົນຜະລິດໄດ້ 3,235 ໂຕ່ນ, ສ່ວນເນື້ອທີ່ເຂົ້ານາປີ 6,331 ເຮັກຕ່າ.

 

ສາມາດມີເຂົ້າກຸ້ມກິນ ແລະສະບຽງອາຫານພຽງພໍ ມີສ່ວນເຫຼືອໄວ້ ແລະຂາຍເປັນສິນຄ້າ; ດ້ານວັດທະນະທໍາ-ສັງຄົມ ໄດ້ຊຸກຍູ້ພໍ່ແມ່ປະຊາຊົນນໍາພາລູກຫຼານໄດ້ເຂົ້າໂຮງຮຽນຕາມເກນອາຍຸ, ແມ່ມານ ແລະເດັກນ້ອຍໄດ້ຮັບການສັກຢາຄົບຖ້ວນ, ໄດ້ຮັບການໂຄສະນາສຸຂະສຶກສາ ທົ່ວເມືອງບໍ່ມີຜູ້ເປັນໄຂ້ເລືອດອອກ ແລະບໍ່ມີຜູ້ຕິດເຊື້ອພະຍາດໂຄວິດ-19 ຈັກກໍລະນີ, ປະຊາຊົນບັນດາເຜົ່າໄດ້ຮັກສາຮີດຄອງປະເພນີ,ວັດທະນະທໍາ ອັນດີງາມຂອງຊາດ, ຂອງເຜົ່າ, ວຽກງານທ່ອງທ່ຽວໄດ້ເລີ່ມມີໜໍ່ແໜງພັດທະນາດີຂຶ້ນ, ການພັດທະນາຊົນນະບົດ ແລະລຶບລ້າງຄວາມທຸກຍາກຕິດພັນກັບວຽກງານ 3 ສ້າງ ໄດ້ຮັບການແກ້ໄຂດີ, ປະຈຸບັນຍັງມີຄອບຄົວທຸກຍາກທັງໝົດ 53 ຄອບຄົວ ທຽບໃສ່ປີ 2019 ສາມາດລຶບລ້າງໄດ້ 2 ຄອບຄົວ, ມີແຜນການສູ້ຊົນລຶບລ້າງແຕ່ນີ້ຫາປີ 2024 ໃຫ້ສໍາເລັດ.


ຜູ້ແທນໄດ້ປະກອບຄຳຄິດ ຄຳເຫັນແລກປ່ຽນບົດຮຽນ ຕໍ່ກອງປະຊຸມ ເພື່ອນໍາໄປຈັດຕັ້ງປະຕິບັດຜັນຂະຫຍາຍ ເຂົ້າໃນວຽກງານຕາມຄວາມຮັບຜິດຊອບຂອງຕົນໃຫ້ມີຜົນສຳເລັດເປັນກ້າວໆ.

ຂ່າວ: ເມືອງເຟືອງ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

July 2020
M T W T F S S
 12345
6789101112
13141516171819
20212223242526
2728293031