Mon. Jul 13th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ກອງປະຊຸມໃຫຍ່ຜູ້ແທນອົງຄະນະພັກເມືອງແກ້ວອຸດົມແຂວງວຽງຈັນ ຄັ້ງທີVII ໄດ້ຮັບຜົນສຳເລັດຢ່າງຈົບງາມ

1 min read

ກອງປະຊຸມໃຫຍ່ຜູ້ແທນອົງຄະນະພັກເມືອງແກ້ວອຸດົມແຂວງວຽງຈັນ ຄັ້ງທີVII ໄດ້ຮັບຜົນສຳເລັດຢ່າງຈົບງາມ.


ກອງປະຊຸມໃຫຍ່ຜູ້ແທນອົງຄະນະພັກເມືອງແກ້ວອຸດົມແຂວງວຽງຈັນຄັ້ງທີVII ໄດ້ຮັບຜົນສຳເລັດຢ່າງຈົບງາມພາຍຫຼັງທີ່ໄດ້ດຳເນີນມາເປັນເວລາ1ວັນເຄິ່ງ,ຢູ່ທີ່ສະໂມສອນເຂຶ່ອນໄຟຟ້ານ້ຳງຶ່ມ1,ໂດຍການເປັນກຽດເຂົ້າຮ່ວມຂອງ ສະຫາຍ ຄຳພັນ ສິດທິດຳພາ ກຳມະການສູນກາງພັກ,ເລຂາພັກແຂວງ,ເຈົ້າແຂວງໆວຽງຈັນ,ມີຄະນະຮັບຜິດຊອບຊີ້ນຳກອງປະຊຸມໃຫຍ່ຂັ້ນແຂວງ, ແຂກຖືກເຊີນ, ພ້ອມດ້ວຍຜູ້ແທນສົມບູນ 107 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວເມືອງ 1.024 ສະຫາຍເຂົ້າຮ່ວມ.

 

ກອງປະຊຸມໃຫຍ່ຄັ້ງນີ້ ໄດ້ພ້ອມກັນຄົ້ນຄວ້າ,ປະກອບຄຳເຫັນ ແລະ ຮັບຮອງເອົາຢ່າງເປັນເອກະສັນຕໍ່ຮ່າງບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີ ຕໍ່ໜ້າ(2020-2024) ແລະ ບົດສຳຫຼວດການນຳພາລວມ ຂອງຄະນະພັກເມືອງແກ້ວອຸດົມ ຊຸດເກົ່າ ເຊິ່ງຕະຫຼອດໄລຍະ 5 ປີຜ່ານມາ ຄະນະພັກເມືອງແກ້ວອຸດົມໄດ້ນຳພາປະຊາຊົນບັນດາເຜົ່າພາຍໃນເມືອງຜ່ານຜ່າອຸປະສັກຫຍຸ້ງຍາກຕ່າງໆນາໆ, ຕັ້ງໜ້າບຸກບືນສູ້ຊົນປະຕິບັດມະຕິກອງປະຊຸມໃຫຍ່ຄັ້ງທີX ຂອງພັກ, ມະຕິ V ຂອງອົງຄະນະພັກແຂວງວຽງຈັນ ແລະ ມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກເມືອງແກ້ວອຸດົມ ໄດ້ມີຜົນສຳເລັດຫຼາຍດ້ານ ອັນພົ້ນເດັ່ນແມ່ນການຫັນເອົາພະນັກງານລົງກໍ່ສ້າງຮາກຖານການເມືອງ ຕິດພັນກັບວຽກງານ 3 ສ້າງ, ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ສະມາຊິກພັກ,

ພະນັກງານ-ລັດຖະກອນ ແລະ ປະຊາຊົນບັນດາເຜົ່າ ເຂົ້າໃຈແຈ້ງຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ເຫັນໄດ້ກົນອຸບາຍເລ່ລ່ຽມຂອງສັດຕູໃນໄລຍະໃໝ່, ເອົາໃຈໃສ່ພັດທະນາເສດຖະກິດ, ວັດທະນາທຳ-ສັງຄົມ,
ປັບປຸງລະບົບການເມືອງຢູ່ຂັ້ນຮາກຖານບ້ານໃຫ້ນັບມື້ນັບເຂັ້ມແຂງຂຶ້ນ.ດ້ວຍຄວາມພະຍາຍາມດັ່ງກ່າວເມືອງແກ້ວອຸດົມໄດ້ມີສະຖຽນລະພາບທາງດ້ານການເມືອງ,
ສັງຄົມມີຄວາມສະຫງົບເປັນລະບຽບຮຽບຮ້ອຍ, ປະຊາຊົນບັນດາເຜົ່າມີຄວາມສາມັກຄີປອງດອງ,


ເຊື່ອໝັ້ນຕໍ່ການນໍາພາຂອງພັກ ແລະ ການຄຸ້ມຄອງຂອງລັດນັບມື້ດີຂຶ້ນ, ເສດຖະກິດໄດ້ຮັບການພັດທະນາຢ່າງຕໍ່ເນື່ອງ, ປະຊາຊົນມີລາຍຮັບເພີ່ມຂື້ນ, ການປະຕິບັດລະບຽບກົດໝາຍນັບມື້ດີຂຶ້ນ,ລະບົບການເມືອງໄດ້ຮັບການປັບປຸງ, ຖັນແຖວສະມາຊິກພັກ-ພະນັກງານ ມີການເຕີບໃຫຍ່ຂະຫຍາຍຕົວ ແລະ ສາມາດເຮັດລ້ອນໜ້າທີ່ການເມືອງທີ່ພັກ-ລັດມອບໝາຍໃຫ້.


ໃນກອງປະຊຸມຍັງໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ບົນພື້ນຖານຖືກຕ້ອງຕາມເງື່ອນໄຂ,ມາດຖານທີ່ກຳນົດໄວ້,ໂດຍມີຜູ້ສະໝັກຮັບເລືອກຕັ້ງ 23 ສະຫາຍ, ເລືອກໄດ້ 19 ສະຫາຍ, ຍິງ 5 ສະຫາຍ, ເພື່ອສືບຕໍ່ຊີ້ນຳ-ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VII ນີ້ໃຫ້ປະກົດຜົນເປັນຈິງ,

ກອງປະຊຸມຄັ້ງປະຖົມມະລຶກໄດ້ເປັນເອກະສັນກັນເລືອກເອົາ ສະຫາຍ ເທບພະໄທ ແກ້ວເຂັມເພັດ ເປັນເລຂາພັກເມືອງ, ສະຫາຍ ວິລະວຸດ ປະກິດ ແລະ ສະຫາຍ ນາງ ບົວໄລ ອຸດົມ ເປັນຮອງເລຂາພັກເມືອງ, ເລືອກເອົາ ສະຫາຍ ນາງ ບົວໄລ ອຸດົມ ເປັນປະທານກວດກາພັກເມືອງ ແລະ ເລືອກເອົາຜູ້ແທນສົມບູນ,ສຳຮອງ ເພື່ອເປັນຕົວແທນຂອງອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ຄັ້ງທີ VI ທີ່ຈະໄຂຂຶ້ນໃນຕໍ່ໜ້ານີ້.

ພິເສດໃນກອງປະຊຸມໃຫຍ່ຄັ້ງນີ້ ຍັງໄດ້ຮັບຟັງການໂອ້ລົມຈາກ ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ ເຊິ່ງເປັນທິດຊີ້ນໍາໃຫ້ແກ່ຄະນະບໍລິຫານງານພັກເມືອງຊຸດໃໝ່ ແລະ ຜູ້ແທນກອງປະຊຸມໃນການປະຕິບັດໜ້າທີ່ວຽກງານ ກໍຄືການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ໃຫ້ປະກົດຜົນເປັນຈິງ.

ຂ່າວ:ບຸນມາ ແກ້ວບຸດດາ.

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

July 2020
M T W T F S S
 12345
6789101112
13141516171819
20212223242526
2728293031