Mon. Jul 13th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ຫ້ອງການສາທາລະນະສຸກ ແລະ ໂຮງໝໍນ້ອຍບ້ານຈຽງ ເມືອງກາສີ ແຂວງວຽງຈັນ ໄດ້ຮັບເຄື່ອງຊ່ວຍເຫຼືອ.

1 min read

​ເພື່ອ​ເປັນ​ການ​ປະ​ກອບ​ສ່ວນ​ເຂົ້າ​ໃນ​ວຽກ​ງານ​ສາ​ທ​າ​ລະ​ນະ​ສຸກ ແລ​ະ ປິ່ນ​ປົວ​ຄົນ​ເຈັບຢູ່​ໂຮງ​ໝໍ​ເມືອງກໍ່​ຄື​ບັນ​ດາ​ສຸກ​ສາ​ລາ​ປະ​ຈຳ​ ກຸ່ມ​ບ້ານ​ ໃຫ້​ທ່ວງ​ທັນ​ກັບ​ເວ​ລາ​ໃນ​ປະ​ຈຸ​ບັນ​ ແລະ ໃນ​ຕໍ່​ໜ້າ.  ວັນ​ທີ 23 ພະ​ຈິກ 2019 ຜ່ານ​ມາ, ສະ​ມາ​ຄົມ​ໂມ​ຣິ​ໂອ​ກະ ໂຣ​ຕາ​ຣີ່ຄ​ລັບ (MORIOKA ROTARY CLUB) ແຫ່ງ​ປະ​ເທດ​ຍີ່​ປຸ່ນ​ໄດ້​ນຳ​ເອົາ​ເຄື່ອງ​​ມື ແລະ ອຸ​ປະ​ກອນ​ດ້ານ​ການ​ແພດ​ມາ​ມອບ​ໃຫ້​ຫ້ອ​ງ​ການ​ສາ​ທາ​ລະ​ນະ​ສຸກ ແລະ ໂຮງ​ໝໍ​ນ້ອຍ​ບ້ານ​ຈ​ຽງ​ ເມືອງ​ກາ​ສີ ແຂວງວຽງ​ຈັນ, ລວມ​ມູນ​ຄ່າ 44 ລ້ານ​ກ່​ວາ​ກີບ.

ພິ​ທີ​ໄດ້​ມີ​ຂຶ້ນ​ຢູ່​ທີ່​ຫ້ອ​ງ​ປະ​ຊຸມ​ຂອງ​ຫ້ອງ​ການ​ສາ​ລະ​ນະ​ສຸກ​ເມືອງ ​ໂດຍໃຫ້​ກຽດ​ເຂົ້າ​ຮ່ວມ​ຂອງ​ທ່ານ ຄຳ​ສົດ​ ເພັດ​ລາ​ວັນ ກຳ​ມະ​ການ​ພັກ​ແຂວງ, ເລ​ຂາ​ພັກ​ເມືອງ​ເຈົ້າ​ເມືອງໆ​ກາ​ສີ, ທ່ານ ນິ​ຊິ ຈິ​ມະ ປະ​ທານ​ສະ​ມາ​ຄົມ ໂມ​ຣິ​ໂອ​ກະ ໂຣ​ຕາ​ຣີ່​ຄ​ລັບ ແຫ່ງ​ປະ​ເທດ​ຍີ່​ປຸ່ນ​ ພ້ອມ​ດ້ວຍ​ຄະ​ນະ, ມີ​ຫົວ​ໜ້າ​ຫ້ອງ​ການ​ສາ​ທາ​ລະ​ນະ​ສຸກ​ເມືອງ​ພ້ອມ​ດ້ວຍ​ຄະ​ນະ, ແຂກ​ຖຶກ​ເຊີນ, ພັກ​ນັກ​ງານ​ທີ່​ກ່ຽວ​ຂ້ອງ ແລ​ະ ທີມ​ງານ​ຈາກ​ສະ​ມາ​ຄົມ​ດັ່ງ​ກ່າວ​ເຂົ້າ​ຮ່ວມ.

ທ່ານ ດ​ຣ. ຄຳ​ສິງ ດວງ​ປັນ​ຍາ ກຳ​ມະ​ການ​ພັກ​ເມືອງ ຫົວ​ໜ້າ​ຫ້ອງ​ການ​ສາ​ລະ​ນະ​ສຸກ​ເມືອງ​ກາ​ສີ ໄດ້​ກ່າວ​ຕ້ອນ​ຮັບ ແລະ ລາຍ​ງານ​ຫ​ຍໍ້​ກ່ຽວ​ກັບ​ຈຸດ​ພິ​ເສດ​ທີ່​ຕັ້ງ​, ພູມ​ສັນ​ຖານ ແລະ ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ສາ​ທາ​ລະ​ນະ​ສຸກ​ຢູ່​ພາຍ​ໃນ​ເມືອງ​ກາ​ສີ, ເຊິ່ງ​ເມືອງ​ກາ​ສ​ມີ​ໂຮງ​ໝໍ​ເມືອງ 1 ແຫ່ງ, ໂຮງ​ໝໍ​ນ້ອຍ 1 ແຫ່ງ, ສຸກ​ສາ​ລາ 3 ແຫ່ງ ແລະ ມີ​ພະ​ນັກ​ງານ​ທັງ​ໝົດ 50 ກ່​ວາ​ຄົນ.

ໃນ​ໂອ​ກາດ​ນີ້​ທ່ານ ນິ​ຊິ ຈິ​ມະ ປະ​ທານ​ສະ​ມາ​ຄົມ​ໂມ​ຣິ​ໂອ​ກະ ໂຣ​ຕາ​ຣີ່​ຄ​ລັບ​ ແຫ່ງ​ປະ​ເທດ​ຍີ່​ປຸ່ນ​ໄດ້​ກ່າວ​ວ່າ: ສະ​ມາ​ຄົມ​ໂມ​ຣິ​ໂອ​ກະ ໂຣ​ຕ​າ​ຣີ່ຄ​ລັບ ແຫ່ງ​ປະ​ເທດ​ຍີ່​ປຸ່ນ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນ​ປີ 1918 ເປັນ​ຕົ້ນ​ມາ ປະ​ຈຸ​ບັນ​ມີ 2.300 ແຫ່ງ​ຢູ່​ທົ່ວ​ໂລກ, ມີ​ສະ​ມາ​ຊິກ​ທັງ​ໝົດ 1 ລ້ານ 2 ແສນ​ກ່​ວາ​ຄົນ. ອຸ​ປະ​ກອນເຄື່ອງ​ມື​ດ້ານ​ການ​ແພດ​ຈຳ​ນວນ​ດັ່ງ​ກ່າວ​ທີ່​ນຳ​ມາ​ມອບ​ໃນ​ຄັ້ງ​ນີ້​ແມ່ນ​ໄດ້​ຈາ​ກ​ການ​ລະ​ດົມ​ທຶນ​ຊ່ວຍ​ເຫລື​ອ​ເຊິ່ງ​ກັນ ​ແລະ ​ກັນ ລະ​ຫວ່າງ ບັນ​ດາ​ສະ​ມາ​ຊິກ​ພາຍ​ໃນ​ກຸ່ມຈຳ​ນວນ 80 ທ່ານ ຂອງ​ເມືອງ​ໂມ​ຣິ​ໂອ​ກະ.

ເຊິ່ງ​ອຸ​ປະ​ກອນ​ເຄື່ອງ​ມື​ດ້ານ​ການ​ແພດ​ທີ່​ນຳ​ມາ​ມອບ​ໃຫ້​ຫ້ອງ​ການ​ສາ​ທາ​ລະ​ນະ​ສຸກ​ເມືອງ ແລະ ໂຮງ​ໝໍ​ນ້ອຍ​ບ້ານ​ຈຽງ​ ເມືອງ​ກາ​ສີ ໃນ​ຄັ້ງ​ນີ້​ປະ​ກອບ​ມີ ອົກ​ຊີ​ໃຫ​ຍ່ ຈຳ​ນວນ 6 ບັ້ງ​, ຊຸດ​ຜ່າ​ຕັດ​ນ້ອຍ 6 ຊຸດ, ຊຸດ​ປະ​ສູດ 7 ຊຸດ, ເຄື່ອງ​ດູດ​ຂີ້​ສະ​ເ​ຫລດ 2 ຊຸດ, ບັນ​ລູນ 2 ຊຸດ, ເຄື່ອງ​ແທກ​ຕັງ​ຊົງ 2 ເຄື່ອງ, ເຄື່ອງ​ຫ​ລົກ​ແຂ້ວ 2 ຊຸດ, ຊຸດ​ປົ​ວ​ແຂ້ວ 5 ຊຸດ, ຄອມ​ພິວ​ເຕີ້ 2 ຊຸດ, ປຼີ່ນເຕີ້ 1 ຊຸດ, ບຼັງກາ 1 ຊຸດ, ຊີງ​ຊັ່ງ​ນ້ຳ​ໜັກ 1 ອັນ ແລະ ຫລັ​ກ​ສະ​ໂລມ 2 ອັນ. ລວມ​ມູນ​ຄ່າ 44 ລ້ານ 4 ແສນ 60 ພັນ​ກີບ. ພ້ອມ​ນີ້ ທ່ານ ນິ​ຊິ ຈິ​ມະ ປະ​ທານ​ສະ​ມາ​ຄົມ ໂມ​ຣິ​ໂອ​ກະ ໂຣ​ຕາ​ຣີ່ ຄ​ລັບ ຍັງ​ໄດ້​ໃຫ້​ກຽດກ່າວມອບ​ອຸ​ປະ​ກອນດັ່ງ​ກ່າວ

ແລະ ໃຫ້​ກຽດ​ກ່າ​ວ​ຮັບ​ໂດຍ​ທ່ານ ຄຳ​ສົດ​ ເພັດ​ລາ​ວັນ ເຈົ້າ​ເມືອງໆ​ກາ​ສີ ເພື່ອ​ນຳ​ໄປ​ມອບ​ຕໍ່​ໃຫ້​ຫ້ອງ​ການ​ສາ​ທາ​ລະ​ນະ​ສຸກ​ເມືອງ, ໂຮງ​ໝໍ​ນ້ອຍ​ບ້ານ​ຈຽງ​ ແລະ ແຈກ​ຢາຍ​ໃຫ້​ບັນ​ດາ​ສຸກ​ສາ ທີ່​ຍັງ​ຂາດ​ເຂີນ​ອຸ​ປະ​ກອນ​ເຄື່ອງ​ມື​ດ້ານ​ການ​ແພດ. ພ້ອມ​ກ່າວ​ຂອບ​ໃຈ​ມາ​ຍັງ​ສະ​ມາ​ຄົມດັ່ງກ່າວ​ທີ່​ເຫັນ​ໄດ້​ຄວາມ​ສຳ​ຄັນ​ຂອງວຽກ​ງານ​ສາ​ທ​າ​ລະ​ນະ​ສຸກ ກໍ່​ຄື​ການ​ປິ່ນ​ປົວ​ຄົນ​ເຈັບ​ຢູ່​ພາຍ​ໃນ​ເມືອງ​ກາ​ສີ ແລະ ຫວັງ​ຢ່າງ​ຍິ່ງວ່າ​ສາຍ​ພົວ​ພັນ​ລະ​ຫວ່າງ ສ​ປ​ປ​ ລາວ ແລະ ປະ​ເທດ​ຍີ່​ປຸ່ນ ເວົ້າ​ລວມ, ເວົ້າ​ສະ​ເພາະ​ກໍ່​ຄື​ເມືອງ​ກາ​ສີ ແຂວງວຽງ​ຈັນ ຈະ​ຍືນ​ຍົງ​ທະ​ນົງ​ແກ່ນ​ຕະ​ຫລອດ​ໄປ ແລະ ຫວັງ​ຢ່າງ​ຍິ່ງ​ວ່າ​ຈະ​ໄດ້​ຮັບ​ການ​ຊ່ວ​ຍ​ເຫລືອ​ໃນ​ອາ​ນາ​ຄົດ​ຕື່ມ​ອີກ. ພ້ອມ​ດຽວ​ກັນ​ນີ້​ທ່ານ​ ຄຳ​ສົດ ເພັດ​ລ​າ​ວັນ ເຈົ້າ​ເມືອງໆ​ກາ​ສີ ຍັງ​ໄດ້​ມອບ​ຂອງ​ຂັວນ, ໃບ​ກຽດ​ຕິ​ຄຸນ ໃຫ້​ແກ່​ສະ​ມາ​ຄົມ​ໂມ​ຣິ​ໂອ​ກະ ໂຣ​ຕາ​ຣີ່​ ຄ​ລັບ ໃນໂອກາດນີ້ທ່ານປະທານສະມາຄົມພ້ອມດ້ວຍຄະນະຍັງໄປຢ້ຽມຢາມ ແລະ ເບິ່ງໂຮງໝໍເມືອງກາສີ ຕື່ມອີກ.

ພາບ – ຂ່າວ: ກິ່ງ​ແກ້ວ ນັກ​ຂ່າວ​ແຂວງວຽງ​ຈັນ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

July 2020
M T W T F S S
 12345
6789101112
13141516171819
20212223242526
2728293031