Mon. Aug 10th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ກອງປະຊຸມໃຫຍ່ ຄັ້ງທີ VII ຂອງສະຫະພັນກຳມະບານແຂວງວຽງຈັນ

1 min read

ກອງປະຊຸມໃຫຍ່ ຄັ້ງທີ VII ຂອງສະຫະພັນກຳມະບານແຂວງວຽງຈັນ ເລືອກໄດ້ຄະນະບໍລິຫານງານຊຸດໃໝ່ທີ່ຖືກຕ້ອງຕາມເງື່ອນໄຂມາດຖານທີ່ກຳນົດໄວ້.


ກອງປະຊຸມໃຫຍ່ຄັ້ງທີ VII ຂອງສະຫະພັນກຳມະບານແຂວງວຽງຈັນ ໄດ້ຈັດຂຶ້ນໃນວັນທີ 3 ກໍລະກົດ 2020 ຢູ່ທີ່ສະໂມສອນກອງບັນຊາການທະຫານແຂວງ,ໂດຍການເປັນກຽດເຂົ້າຮ່ວມຂອງ ສະຫາຍ ຄຳພັນ ສິດທິດຳພາ ກຳມະການສູນກາງພັກ,ເລຂາພັກແຂວງ,ເຈົ້າແຂວງໆວຽງຈັນ,ສະຫາຍ ວັນນາ ດວງພະຈັນ ຮອງປະທານສູນກາງສະຫະພັນກຳມະບານລາວ, ມີຄະນະຮັບຜິດຊອບຊີ້ນຳກອງປະຊຸມໃຫຍ່ຂັ້ນແຂວງ,ແຂກຖືກເຊີນ,ຄະນະບໍລິຫານງານສະຫະພັນກຳມະບານແຂວງ,ພ້ອມດ້ວຍຜູ້ແທນສົມບູນ 146 ສະຫາຍ,ຍິງ 35 ສະຫາຍເຊິ່ງເປັນຕົວແທນໃຫ້ແກ່ສະມາຊິກກຳມະບານທົ່ວແຂວງ 12.054 ສະຫາຍເຂົ້າຮ່ວມ.


ສະຫາຍ ຄຳພູທອນ ເທບສຸພົມ ກຳມະການພັກແຂວງ, ປະທານສະຫະພັນກຳມະບານແຂວງວຽງຈັນ ໄດ້ກ່າວໃນບົດລາຍງານການເມືອງບາງຕອນສຳຄັນວ່າ: ສະຫະພັນກໍາມະບານແຕ່ລະຂັ້ນໃນທົ່ວແຂວງວຽງຈັນໄດ້ຖືເອົາວຽກງານປົກປ້ອງສິດ ແລະ ຜົນປະໂຫຍດອັນຊອບທຳຂອງກໍາມະກອນ ແລະ ຊາວຜູ້ອອກແຮງງານເປັນວຽກງານສໍາຄັນ ເປັນຕົ້ນໄດ້ນໍາເອົາເເນວທາງເເຜນນະ ໂຍບາຍຂອງພັກ-ລັດ, ກົດລະບຽບ, ກົດໝາຍວ່າດ້ວຍກຳມະບານລາວ, ກົດໝາຍວ່າດ້ວຍແຮງງານ, ກົດໝາຍປະກັນສັງຄົມ ແລະ ນິຕິກໍາອື່ນໆ ໄປເຜີຍແຜ່ ໃຫ້ຜູ້ປະກອບການ, ກຳມະກອນ ແລະ ຊາວຜູ້ອອກແຮງງານບັນດາເຜົ່າໃນທົ່ວແຂວງ ໄດ້ຮັບຮູ້ເຂົ້າໃຈຢ່າງເລິກເຊິ່ງ.

ທົ່ວແຂວງມີຫົວໜ່ວຍແຮງງານທັງໝົດ 156 ຫົວໜ່ວຍ ມີກໍາມະກອນທັງໝົດ 5.015 ຄົນ, ຍິງ 2.515 ຄົນ,ໄດ້ລົງໂຄສະນາ ແລະ ຕິດຕາມເບິ່ງຄວາມປອດໄພຊີວະອານາໄມສະຖານທີ່ເຮັດວຽກຂອງກຳມະກອນຢູ່ຫົວໜ່ວຍແຮງງານຕ່າງໆ, ໄດ້ສ້າງສັນຍາແຮງງານລວມໝູ່ຢູ່ບັນດາຫົວໜ່ວຍແຮງງານເອກະຊົນ 54 ແຫ່ງ, ມີກໍາມະກອນທັງໝົດ 1.562 ຄົນ, ແລະ ປັບປຸງສັນຍາແຮງງານຄືນໃໝ່ 12 ແຫ່ງ, ມີກໍາມະກອນທັງໝົດ 928 ຄົນ, ລົງໂຄສະນາວຽກງານຕ້ານການຄ້າມະນຸດໄດ້ 5 ຄັ້ງ, ສົ່ງເດັກທີ່ຖືກເຄາະຮ້າຍຈາກຂະບວນການຄ້າມະນຸດສູ່ຄອບຄົວຈຳນວນ 9 ຄົນ, ປະກອບອາຊີບໃຫ້ເດັກຜູ້ຖືກເຄາະຮ້າຍຈາກການຄ້າມະນຸດຈຳນວນ 6 ຄົນ, ລົງຕິດຕາມການປະຕິບັດໂມງເວລາເຮັດວຽກຂອງກຳມະກອນ ຢູ່ໂຮງຈັກໂຮງງານ ໄດ້ເຮັດໃຫ້ກໍາມະກອນ ແລະ ຊາວຜູ້ອອກແຮງງານຢູ່ແຂວງວຽງຈັນ ໄດ້ເຕີບໃຫຍ່ຂະຫຍາຍຕົວ, ລະດັບຄວາມຮູ້, ຄວາມສາມາດ, ສີມີແຮງງານໄດ້ຮັບການພັດທະນາດີຂຶ້ນ ແລະ ກາຍເປັນກໍາລັງການຜະລິດຕົ້ນຕໍ, ສາມາດຕອບສະໜອງຄວາມຮຽກຮ້ອງຕ້ອງການຂອງຫົວ
ໜ່ວຍແຮງງານໃນແຕ່ລະຂົງເຂດວຽກງານ, ຊີວິດການເປັນຢູ່ຂອງສະມາຊິກກຳມະບານ, ກໍາມະກອນ ແລະ ຊາວຜູ້ອອກແຮງງານບັນດາເຜົ່າ ໄດ້ຮັບປັບປຸງໃຫ້ດີຂຶ້ນກວ່າເກົ່າ.


ໃນກອງປະຊຸມໃຫຍ່ຄັ້ງນີ້ບັນດາຜູ້ແທນສົມບູນ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານສະຫະພັນກຳມະບານແຂວງວຽງຈັນຊຸດໃໝ່ ບົນພື້ນຖານຄວາມຖືກຕ້ອງຕາມເງື່ອນໄຂມາດຖາມທີ່ກຳນົດໄວ້ ໂດຍມີຜູ້ອອກຮັບສະໝັກເລືອກຕັ້ງທັງໝົດ 35 ສະຫາຍ,ເລືອກໄດ້ 31 ສະຫາຍ,ກອງປະຊຸມຄັ້ງປະຖົມມະລຶກໄດ້ເປັນເອກະສັນກັນເລືອກເອົາ ສະຫາຍ ຄຳພູທອນ ເທບສຸພົມ ເປັນປະທານ,ເລືອກເອົາຮອງປະທານ 4 ສະຫາຍ, ມີ ສະຫາຍ ບົວລຳແພງ ວາງປະດິດ, ສະຫາຍ ນາງ ບຸນຄ້ຳ ສີສຸທຳ,ສະຫາຍ ແສງທຳ ອະໄພຍະລາດ, ສະຫາຍ ຂັນໄຊ ຫຼວງຜ່ານ ເປັນຮອງປະທານສະຫະພັນກຳມະບານແຂວງວຽງຈັນຊຸດໃໝ່ ເພຶ່ອສືບຕໍ່ຊີ້ີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ.ພ້ອມທັງເລືອກເອົາຜູ້ແທນສົມບູນ 25 ສະຫາຍ ແລະ ສຳຮອງ 2 ສະຫາຍ ໄປຮ່ວມກອງປະຊຸມໃຫຍ່ຄັ້ງທີ VIII ຂອງສູນກາງສະຫະພັນກຳມະບານລາວ ທີ່ຈະຈັດຂຶ້ນໃນຕໍ່ໜ້ານີ້ີ.


ໃນໂອກາດດຽວກັນນີ້ກໍໄດ້ປະກາດຮັບຮອງເອົາສະຫະພັນກຳມະບານແຂວງວຽງຈັນ ເປັນສະຫະພັນກຳມະບານ 5 ເປັນເຈົ້າ ສະໄໝທີI ,ປະດັບຫຼຽນກາກຳມະບານລາວໃຫ້ບຸກຄົນທີ່ມີຜົນງານດີເດັ່ນໃນການຊີ້ນຳ-ນຳພາວຽກງານກຳມະບານໃນໄລຍະຜ່ານມາ,ໃຫ້ກຽດມອບໃບຢັ້ງຢືນ,ຕັດແຖບຜ້າ,ເປີດປ້າຍ,ລັ່ັ່ັ່ັ່ນຄ້ອງ 9 ບາດ ແລະ ປ່ອຍປູມເປົ້າ ໂດຍສະຫາຍ ຄຳພັນ ສິດທິດຳພາ ກຳມະການສູນກາງພັກ,ເລຂາພັກແຂວງ,ເຈົ້າແຂວງໆວຽງຈັນ,ສະຫາຍ ວັນນາ ດວງພະຈັນ ຮອງປະທານສູນກາງສະຫະພັນກຳມະບານລາວ.

ຂ່າວ: ບຸນມາ ແກ້ວບຸດດາ.

 

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

August 2020
M T W T F S S
 12
3456789
10111213141516
17181920212223
24252627282930
31