Wed. Oct 21st, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ກອງປະຊຸມຄົບຄະນະບໍລິຫານງານ ພັກເມືອງຊະນະຄາມ ຄັ້ງທີ 3 ສະໄໝທີ VII

1 min read

ກອງປະຊຸມ ໄດ້ໄຂຂຶ້ນໃນກາງເດືອນ ກໍລະກົດ 2020 ທີ່ຜ່ານມາ, ຢູ່ທີ່ສະໂມສອນຂອງເມືອງດັ່ງກ່າວ, ກໍານົດເວລາ 1 ວັນເຕັມ, ພາຍໃຕ້ການເປັນປະທານຂອງສະຫາຍ ສະໝານ ວິເສດຍະພົງສ໌ ເລຂາພັກເມືອງ ວ່າການເຈົ້າເມືອງໆຊະນະຄາມ, ໃນກອງປະຊຸມໄດ້ເປັນກຽດຕ້ອນຮັບການເຂົ້າຮ່ວມຂອງ ສະຫາຍ ພົຈ ປອ ທອງເຄນ ບຸນໝັ້ນ ກໍາມະການປະຈໍາພັກແຂວງ ຫົວໜ້າກອງບັນຊາການປ້ອງກັນຄວາມສະຫງົບ ແຂວງວຽງຈັນ, ມີບັນດາສະຫາຍໃນກໍາມະການປະຈໍາພັກເມືອງ, ກໍາມະການພັກເມືອງ, ເລຂາຄະນະພັກຮາກຖານ, ເລຂາໜ່ວຍພັກ, ພະນັກງານອາວຸໂສບໍານານ ແລະ ບັນດາຫົວໜ້າຫ້ອງການອ້ອມຂ້າງ, ເຂົ້າຮ່ວມທັງໝົດ 71 ສະຫາຍ, ຍິງ 6 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດ 1.288 ສະຫາຍ, ຍິງ 348 ສະຫາຍ ໃນທົ່ວເມືອງຊະນະຄາມ.


ກອງປະຊຸມ ໄດ້ຮັບຟັງການສະຫຼຸບຕີລາຄາ ການຈັດຕັ້ງປະຕິບັດວຽກງານຮອບດ້ານ 6 ເດືອນຕົ້ນປີ ແລະ ກໍານົດທິດທາງແຜນການຄາດໝາຍສູ້ຊົນ 6 ເດືອນທ້າຍປີ 2020, ເຊິ່ງໄດ້ຍົກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ ແລະ ຂໍ້ຫຍຸ້ງຍາກ ເປັນຕົ້ນແມ່ນການແຜ່ລະບາດຂອງພະຍາດອັກເສບປອດສາຍພັນໃໝ່( ໂຄວິດ 19 ), ອັນໄດ້ສ້າງຜົນກະທົບໃຫ້ແກ່ການພັດທະນາເສດຖະກິດ – ສັງຄົມຂອງບັນດາປະເທດຕ່າງໆໃນທົ່ວໂລກ, ໃນວາລະດັ່ງກ່າວ ບັນດາສະຫາຍຜູ່ແທນກອງປະຊຸມໄດ້ພ້ອມກັນປະກອບຄໍາຄິດຄໍາເຫັນ ດ້ວຍຄວາມຮັບຜິດຊອບສູງ, ມີລະບຽບວິໃນດີ ເພື່ອພ້ອມກັນສຸມສະຕິປັນຍາໃນການແກ້ໄຂບັນຫາເຂົາໃນບົດສະຫຼຸບທັງສອງພາກ ດ້ວຍບັນຍາກາດທີ່ຟົດຟື້ນ ແລະ ມີຄວາມເປັນເອກະພາບສູງໃນການຊີ້ນໍາ-ນໍາພາວຽກງານຮອບດ້ານ.


ກອງປະຊຸມ ໄດ້ພ້ອມກັນຮັບຮອງເອົາທິດທາງ ແຜນການເຂົ້າໃນວຽກງານຈຸດສຸມ, ເປັນຕົ້ນ ບັນດາຄະນະພັກຕ້ອງເອົາໃຈໃສ່ເພີ່ມທະວີ ແລະ ກໍາແໜ້ນບັນດາແນວທາງການປ່ຽນແປງໃໝ່ຂອງພັກ, ເພີ່ມທະວີທາງດ້ານວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ເປັນຂອງທົ່ວປວງຊົນ ແລະ ແຂງແຮງ, ສູ້ຊົນໃນການພັດທະນາພື້ນຖານໂຄງລ່າງໃຫ້ຕິດພັນກັບການປັບປຸງພື້ນຖານເສດຖະກິດມະຫາພາກຂອງເມືອງໃຫ້ມີຄວາມໝັ້ນທ່ຽງ ແລະ ຖືກທິດ, ສືບຕໍ່ໃນການລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ, ສົ່ງເສີມຢ່າງແຂງແຮງໃນການສ້າງຊີວິດການເປັນຢູ່ຂອງປະຊາຊົນໃຫ້ມີຄວາມກ້າວໜ້າ, ສົ່ງເສີມຄວາມສາມັກຄີປະຊາຊົນບັນດາເຜົ່າພາຍໃຫ້ມີຄວາມໜັກແໜ້ນ, ເອົາໃຈໃສ່ໃນການຊຸກຍູ້ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ສູ້ຊົນໃນການຍາດແຍ່ງແຫຼ່ງທຶນຈາກບັນດາປະເທດເພື່ອນມິດ ແລະ ບັນດາປະເທດໃກ້ຄຽງເຂົ້າໃນການຊ່ວຍເຫຼືອລ້າ ແລະ ການລົງທຶນພາຍໃນເມືອງໃຫ້ຫຼາຍຂຶ້ນ, ເຊິ່ງທັງໝົດນີ້ ມັນໄດ້ຮຽກຮ້ອງມາຍັງຄະນະພັກແຕ່ລະສະຫາຍ ຕ້ອງກໍາແໜ້ນທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດຢ່າງໜັກແໜ້ນ, ເປັນແບບຢ່າງນໍາໜ້າໃຫ້ແກ່ສະມາຊິກພັກ, ພະນັກງານ ໃນການຈັດຕັ້ງເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ ໂດຍສະເພາະຕໍ່ກັບທິດທາງແຜນການ 3 ເດືອນ ແລະ 6 ເດືອນທ້າຍປີທີ່ວາງໄວ້ ໃຫ້ມີຜົົນສໍາເລັດຕາມລະດັບຄາດໝາຍ.


ໃນກອງປະຊຸມ ຍັງໄດ້ຮັບຟັງການມີຄໍາເຫັນໂອ້ລົມຈາກສະຫາຍ ພົຈ ປອ ທອງເຄນ ບຸນໝັ້ນ ຄະນະປະຈໍາພັກແຂວງ ຫົວໜ້າກອງບັນຊາການ ປກສ ແຂວງວຽງຈັນ, ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ-ນໍາພາຂອງຄະນະບໍລິຫານງານພັກເມືອງຊຸດທີ VII ທີ່ສາມາດຍາດໄດ້ຜົນສໍາເລັດຫຼາຍດ້ານ, ພ້ອມກັນນີ້ສະຫາຍ ຍັງໄດ້ສະແດງຄວາມເປັນຫ່ວງເປັນໄຍ ແລະ ມີຄໍາເຫັນໂອ້ລົມ ເຊິ່ງໄດ້ກາຍເປັນເຂັມທິດຊີ້ເຍືອງທາງ ແລະ ເປັນບົດຮຽນທີ່ລໍ້າເລີດໃຫ້ແກ່ຄະນະບໍລິຫານງານພັກເມືອງ ເພື່ອນໍາໄປຈັດຕັ້ງຜັນຂະຫາຍເຂົ້າສູ່ວຽກງານໃນຕໍ່ໜ້າ.


ກອງປະຊຸມໃນຄັ້ງນີ້ ຍັງໄດ້ຮຽກຮ້ອງມາຍັງຄະນະພັກ, ພະນັກງານນໍາພາ-ຄຸ້ມຄອງ, ພະນັກງານຫຼັກແຫຼ່ງ, ທະຫານ-ຕໍາຫຼວດ, ອົງການປົກຄອງ ແລະ ປະຊາຊົນບັນດາເຜົ່າພາຍໃນເມືອງ, ຈົ່ງພ້ອມກັນເຊີດຊູສະຕິເປັນເຈົ້າ ແລະ ຄວາມຮັບຜິດຊອບທາງດ້ານການເມືອງໃຫ້ສູງຂຶ້ນກວ່າເກົ່າ, ເພື່ອແນໃສ່ໃນການຈັດຕັ້ງຜັນຂະຫາຍມະຕີິກອງປະຊຸມໃຫຍ່ຂອງອົງຄະນະພັກເມືອງ ຄັ້ງທີ VII ກໍ່ຄືມະຕິກອງປະຊຸມຄົບຄະນະບໍລິຫານງານພັກເມືອງຄັ້ງທີ 3 ສະໄໝທີ VII ທີ່ໄດ້ກໍານົດອອກໃຫ້ປະກົດຜົນເປັນຈິງ.

ຂ່າວ:ເມືອງຊະນະຄາມ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031  

You may have missed