Sun. Oct 25th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ເມືອງເຟືອງສະຫຼຸບວຽກງານກໍ່ສ້າງຮາກຖານເມືອງ ພັດທະນາຊົນນະບົດ ຕິດພັນກັບວຽກງານ 3 ສ້າງ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020

1 min read

ເມືອງເຟືອງສະຫຼຸບວຽກງານກໍ່ສ້າງຮາກຖານເມືອງ ພັດທະນາຊົນນະບົດ ຕິດພັນກັບວຽກງານ 3 ສ້າງ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020.


ເມືອງເຟືອງໄດ້ໄຂກອງປະຊຸມສະຫຼຸບວຽກງານ ກໍ່ສ້າງຮາກຖານການເມືອງ ພັດທະນາຊົນນະບົດ ຕິດພັນກັບວຽກງານ 3 ສ້າງ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020, ເຊີ່ງໄດ້ໄຂຂຶ້ນໃນວັນທີ 16 ກໍລະກົດ 2020,

ໂດຍການເປັນປະທານຂອງທ່ານ ຄໍາເພັດ ຈັນສົມພູ ເລຂາຄະນະບໍລິຫານງານພັກເມືອງ ເຈົ້າເມືອງໆເຟືອງ ແລະເປັນກຽດເຂົ້່າຮ່ວມຂອງທ່ານ ທອງສະຫວັນ ວົງສໍາພັນ ຄະນະປະຈໍາພັກແຂວງ ປະທານແນວລາວສ້າງຊາດແຂວງ ຜູ້ຊີ້ນໍາອົງການຈັດຕັ້ງມະຫາຊົນແຂວງວຽງຈັນ ທັງເປັນຜູ້ຊີ້ນໍາເມືອງເຟືອງ, ມີບັນດາຄະນະປະຈໍາ, ກໍາມະການພັກເມືອງ, ເລຂາຄະນະພັກຮາກຖານສຳນັກງານ, ຫົວໜ້າ, ຄະນະຫ້ອງການ, ຫົວໜ້າກຸ່ມບ້ານ ຕະຫຼອດຮອດຄະນະພັກຮາກຖານ ເລຂາພັກບ້ານ ເຂົ້າຮ່ວມທັງໝົດ 68 ທ່ານ, ຍິງ 9 ທ່ານ.


ທ່ານ ອາດ ວິໄລພົນ ກໍາມະການພັກເມືອງ ຫົວໜ້າຫ້ອງວ່າການເມືອງເຟືອງ ໄດ້ຂຶ້ນຜ່ານບົດສະຫຼຸບຕີລາຄາສະພາບການຈັດຕັ້ງປະຕິບັດ ວຽກງານກໍ່ສ້າງຮາກຖານການເມືອງ ພັດທະນາຊົນນະ ບົດຮອບດ້ານ ຕິດພັນກັບວຽກງານ 3 ສ້າງໃນໄລຍະ 6 ເດືອນຕົ້ນປີ ຜ່ານມາ ແລະທິດທາງແຜນການ 6 ເດືອນທ້າຍປີ 2020, ເຊີ່ງໄດ້ຍົກໃຫ້ຮູ້ວ່າ: ທົ່ວເມືອງມີ 5 ກຸ່ມບ້ານ, 1 ຈຸດສຸມພັດທະນາຂອງແຂວງ, ມີພະນັກງານກໍ່ສ້າງຮາກຖານທີ່ມາຈາກແຂວງ ແລະເມືອງທັງໝົດ 26 ທ່ານ, ຍິງ 1 ທ່ານ, ມີຄະນະປະຈໍາ, ກໍາມະການພັກເມືອງລົງຊີ້ນໍາ 14 ທ່ານ, ຍິງ 1 ທ່ານ ເພື່ອຊີ້ນໍາ-ນໍາພາຈັດຕັ້ງປະຕິບັດຕາມ 4 ເນື້ອໃນ 4 ຄາດໝາຍ.


ຜ່ານການຈັດຕັ້ງປະຕິບັດຕົວຈິງຢູ່ຮາກຖານ ປະຊາຊົນສ່ວນຫຼາຍແມ່ນໄດ້ຮັບການສຶກສາອົບຮົມທາງດ້ານການເມືອງແນວຄິດ, ຕັ້ງໜ້າປະກອບສ່ວນທຸກການນໍາພາຂອງພັກ, ມີຄວາມຕື່ນຕົວປະຕິບັດຕາມລະບຽບກົດໝາຍຂອງລັດ, ພ້ອມກັນສ້າງສາພັດທະນາຊີວິດການເປັນຢູ່, ພື້ນຖານໂຄງລ່າງໄດ້ຮັບການປັບປຸງ ປົວແປງ ໂດຍສະເພາະ ເສັ້ນທາງພາຍໃນເມືອງ, ບ້ານຕໍ່ບ້ານ ບາງບ່ອນໄດ້ຮັບການສ້ອມແປງດີຂຶ້ນ. ປະຊາຊົນບັນດາເຜົ່າຊາວເມືອງເຟືອງສ່ວນຫຼາຍ ມີຄວາມເປັນເຈົ້າການ ປົກປັກຮັກສາຮີດຄອງປະເພນີ ອັນດີງາມຂອງຊາດ, ຂອງເຜົ່າ, ລູກຫຼານໄດ້ເຂົ້າໂຮງຮຽນຕາມເກນອາຍຸ, ພ້ອມນີ້ ກໍ່ໄດ້ພາກັນຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19.


ສໍາລັບທິດທາງແຜນການຕໍ່ໜ້າຈະໄດ້ສຸມໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ລະບຽບກົດໝາຍຂອງລັດຢ່າງເລິກເຊີ່ງ, ສຸມໃສ່ແກ້ໄຂບັນຫາປະກົດການຫຍໍ້ທໍ້ ແລະຂໍ້ຂັດແຍ່ງຕ່າງໆ ໃຫ້ຫຼຸດນ້ອຍຖອຍລົງ.

ຍົກລະດັບຊີວິດການເປັນຢູ່ ຂອງພໍ່ແມ່ປະຊາຊົນບັນດາເຜົ່າ, ເລັ່ງໃສ່ພັດທະນາດ້ານການບໍລິການ-ການທ່ອງທ່ຽວ ແລະການຜະລິດກະສິກໍາ ການປູກ, ການລຽ້ງ ເປັນສິນຄ້າ, ສືບຕໍ່ຫັນເອົາພະນັກງານລົງກໍ່ສ້າງຮາກຖານການເມືອງ ແລະພັດທະນາຊົນນະບົດຮອບດ້ານ.


ໃນກອງປະຊຸມຄັ້ງນີ້ຜູ້ແທນທີ່ເຂົ້າຮ່ວມ ກໍ່ໄດ້ຮັບການເຊື່ອມຊຶມ ມະຕິສໍາຄັນຈຳນວນໜຶ່ງ ຄື: ມະຕິກອງປະຊຸມຄົບຄະນະ ຄັ້ງທີ 10 ຂອງຄະນະບໍລິຫານງານສູນກາງພັກສະໄໝທີ X , ມະຕິຂອງກົມການການເມືອງສູນກາງພັກ ສະບັບເລກທີ 108 ວ່າດ້ວຍ ວຽກງານແນວໂຮມ ແລະວຽກງານມະຫາຊົນຂອງພັກໃນໄລຍະໃໝ່, ມະຕິຂອງກົມການເມືອງສູນກາງພັກສະບັບເລກທີ 111 ວ່າດ້ວຍ ເພີ່ມທະວີວຽກງານປ້ອງກັນຄວາມສະຫງົບ ໃນສະພາບການໃໝ່, ມະຕິຂອງກົມການເມືອງສູນກາງພັກ ສະບັບເລກທີ 112 ວ່າດ້ວຍ ການຍົກສູງຄຸນນະພາບ ການດໍາເນີນຄະດີຕາມຂະບວນຍຸຕິທໍາ, ມະຕິຂອງກົມການເມືອງສູນກາງພັກ ສະບັບເລກທີ 107 ວ່າດ້ວຍພັດທະນານະຄອນ ຫຼວງວຽງຈັນ ໃນໄລຍະໃໝ່. ເຊີ່ງທັງໝົດເລົ່ານີ້ ໄດ້ເຮັດໃຫ້ຜູ້ເຂົ້າຮ່ວມກອງປະຊຸມຮັບຮູ້, ເຂົ້າໃຈ ແລະຈະໄດ້ນໍາໄປຈັດຕັ້ງປະຕິບັດໃຫ້ເປັນຮູບປະທໍາຕົວຈິງ.

ຂ່າວໂດຍ: ສົມຄິດ ຈິດດາວົງ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031