Wed. Oct 21st, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ກອງປະຊຸມທາບທາມຄໍາເຫັນຕໍ່ຮ່າງກົດຫມາຍ ວ່າດ້ວຍ ຊາຍແດນແຫ່ງຊາດ ສໍາລັບ 06 ແຂວງພາກກາງ 

1 min read

ກອງປະຊຸມທາບທາມຄໍາເຫັນຕໍ່ຮ່າງກົດຫມາຍ
ວ່າດ້ວຍ ຊາຍແດນແຫ່ງຊາດ ສໍາລັບ 06 ແຂວງພາກກາງ

ໃນວັນທີ 22-23 ກໍລະກົດ 2020 ທີ່ ຫ້ອງປະຊຸມ ໂຮງແຮມທະວີສຸກ, ເມືອງວັງວຽງ, ແຂວງວຽງຈັນ, ກະຊວງການ ຕ່າງປະເທດໄດ້ຈັດຕັ້ງກອງປະຊຸມທາບທາມຄໍາເຫັນຕໍ່ຮ່າງກົດຫມາຍ ວ່າດ້ວຍ ຊາຍແດນແຫ່ງຊາດ ສໍາລັບ 06 ແຂວງ ພາກກາງ ຄື: ແຂວງວຽງຈັນ, ບໍລິຄໍາໄຊ, ໄຊສົມບູນ, ຄໍາມ່ວນ, ສະຫວັນນະເຂດ ແລະ ນະຄອນຫຼວງວຽງຈັນ

ພາຍໃຕ້ການເປັນປະທານ ຮ່ວມຂອງ ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ, ຫົວຫນ້າຄະນະຮັບຜິດຊອບສ້າງຮ່າງກົດໝາຍ ແລະ ທ່ານ ບຸນສອນ ເພັດລາວັນ, ຮອງເຈົ້າແຂວງແຂວງວຽງຈັນ ໂດຍມີບັນດາຮອງເຈົ້າແຂວງ, ຮອງປະທານກໍາມາທິການ ການຕ່າງປະເທດ ສະພາແຫ່ງຊາດ, ປະທານສະພາປະຊາຊົນແຂວງ ແລະ ຮອງປະທານສະພາປະຊາຊົນແຂວງ, ສະມາຊິກ ສະພາແຫ່ງຊາດປະຈໍາເຂດເລືອກຕັ້ງ, ຫົວຫນ້າ ແລະ ຮອງຫົວຫນ້າຫ້ອງວ່າການປົກຄອງແຂວງ, ຫົວຫນ້າ ແລະ ຮອງຫົວຫນ້າກອງບັນຊາການທະຫານແຂວງ, ຫົວຫນ້າ ແລະ ຮອງຫົວຫນ້າກອງບັນຊາການປ້ອງກັນຄວາມສະຫງົບແຂວງ, ເຈົ້ານະຄອນ, ເຈົ້າເມືອງ ແລະ ຮອງເຈົ້າເມືອງ, ຫົວຫນ້າ ແລະ ຮອງຫົວຫນ້າພະແນກ ແລະ ຜູ້ຕາງຫນ້າຈາກຂະແຫນງການຂັ້ນແຂວງທີ່ກ່ຽວຂ້ອງຂອງ 06 ແຂວງພາກກາງ ເຂົ້າຮ່ວມ ຈໍານວນ 100 ກວ່າທ່ານ.


ການຈັດຕັ້ງກອງປະຊຸມ ໃນຄັ້ງນີ້ ແມ່ນມີຈຸດປະສົງໃນການສືບຕໍ່ທາບທາມຄໍາເຫັນຕໍ່ຮ່າງກົດຫມາຍດັ່ງກ່າວ ນໍາອໍານາດ ການປົກຄອງຂັ້ນແຂວງ, ຂັ້ນເມືອງແລະ ຂະແໜງການຕ່າງໆຂັ້ນແຂວງຂອງ 6 ແຂວງ ພາກກາງ ພາຍຫຼັງທີ່ໄດ້ສໍາເລັດການ ທາບທາມຄໍາເຫັນສໍາລັບຂັ້ນສູນກາງໃນທ້າຍເດືອນມິຖຸນາ ແລະ ບັນດາແຂວງພາກເຫນືອໃນຕົ້ນເດືອນກໍລະກົດທີ່ຜ່ານມາ, ຈາກນັ້ນກໍ່ຈະສືບຕໍ່ດໍາເນີນການທາບທາມຄໍາເຫັນນໍາ ບັນດາແຂວງພາກໃຕ້ ໃຫ້ສໍາເລັດໃນຕົ້ນເດືອນສິງຫານີ້.


ຫຼັງຈາກສໍາເລັດຂະບວນການທາບທາມຄໍາເຫັນຕໍ່ຮ່າງກົດຫມາຍສະບັບນີ້ແລ້ວ, ຄະນະຮັບຜິດຊອບກໍ່ຈະສັງລວມຄໍາເຫັນ ແລະ ຂໍ້ສະເຫນີຕ່າງໆ ເພື່ອນໍາໄປປັບປຸງໃຫ້ມີເນື້ອໃນ ລະອຽດ, ຈະແຈ້ງ, ຄົບຖ້ວນ ແລະ ຮັດກຸມ ເພື່ອໃຫ້ສາມາດນໍາເອົາຮ່າງກົດຫມາຍດັ່ງກ່າວ ເຂົ້າພິຈາລະນາຢູ່ກອງປະຊຸມລັດຖະບານ ປະຈໍາເດືອນ ສິງຫາ 2020 ແລະ ນໍາເຂົ້າພິຈາລະນາຢູ່ກອງປະຊຸມ ສະໄຫມສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VII ໃນທ້າຍປີ 2020 ຕາມລໍາດັບ.


ການສ້າງກົດຫມາຍ ວ່າດ້ວຍ ຊາຍແດນແຫ່ງຊາດ ເພື່ອກໍານົດຫຼັກການ, ລະບຽບການ ແລະ ມາດຕະການ ກ່ຽວກັບ ຊາຍແດນແຫ່ງຊາດ ແລະ ວຽກງານຊາຍແດນ ແນ່ໃສ່ເພີ່ມທະວີການຄຸ້ມຄອງວຽກງານຊາຍແດນແຫ່ງຊາດ ໃຫ້ລວມສູນ ແລະ ເປັນເອກະພາບ ໃນຂອບເຂດທົ່ວປະເທດ ທັງເປັນພື້ນຖານໃຫ້ແກ່ບົດບັນຍັດຂອງກົດຫມາຍ ແລະ ນິຕິກໍາໃຕ້ກົດຫມາຍອື່ນທີ່ ກ່ຽວຂ້ອງ ແມ່ນມີຄວາມສໍາຄັນທີ່ສຸດ ແລະ ມີຄວາມຈໍາເປັນພາວະວິໄສອັນຮີບດ່ວນ.

ນອກຈາກນັ້ນ, ກົດຫມາຍສະບັບນີ້ ກໍ່ຍັງ ເຮັດໃຫ້ພົນລະເມືອງລາວທຸກຄົນ ແລະ ທຸກອົງການຈັດຕັ້ງໃນລະບົບການເມືອງຂອງ ສປປ ລາວ ມີຄວາມຮັບຮູ້ ແລະ ຄວາມເຂົ້າໃຈ ກ່ຽວກັບ ຄວາມຫມາຍຄວາມສໍາຄັນຂອງຊາຍແດນແຫ່ງຊາດ; ຄວາມຮັບຜິດຊອບ ແລະ ພັນທະຂອງຕົນ ໃນການເຄົາລົບຊາຍແດນແຫ່ງຊາດ; ພາລະກິດໃນການສ້າງ, ຄຸ້ມຄອງ ແລະ ປ້ອງກັນຊາຍແດນແຫ່ງຊາດ ກໍ່ຄືການປົກປັກຮັກສາຄວາມ ສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມຢູ່ບໍລິເວນຊາຍແດນ.

ຂ່າວ: ເມືອງວັງວຽງ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031  

You may have missed