Thu. Oct 22nd, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ປູກພືດໝູນວຽນສ້າງລາຍຮັບເຂົ້າໃນຄອບຄົວໄດ້ຫຼາຍລ້ານກີບຕໍ່ປີ

1 min read

ປູກພືດໝູນວຽນສ້າງລາຍຮັບເຂົ້າໃນຄອບຄົວໄດ້ຫຼາຍລ້ານກີບຕໍ່ປີ.


ທ້າວ ຢົງສີ ເຮີ ອາຍຸ 58 ປີ ,ອະດີດເລຂາພັກບ້ານ-ນາຍບ້ານໆໂນນຕ້ອງ ເມືອງໝື່ນ ແຂວງວຽງຈັນ ເປັນໜຶ່ງໃນຄອບຄົວ ທີ່ເຫັນໄດ້ແນວທາງນະໂຍບາຍຂອງພັກ ກໍ່ຄືອົງການປົກຄອງເມືອງໝື່ນ ແລະ ພາກສ່ວນທີ່ກ່ຽວຂ້ອງ ທີ່ຍາມໃດ ກໍ່ໄດ້ເອົາໃຈໃສ່ຊຸກຍູ້ ສົ່ງເສີມໃຫ້ພໍ່ແມ່ປະຊາຊົນບັນດາເຜົ່າ ພາຍໃນເມືອງໝື່ນ ເພີ່ມທະວີການສ້າງເສດຖະກິດຄອບຄົວ ເພື່ອແກ້ໄຂຊີວິດການເປັນຢູ່ ໃຫ້ນັບມື້ດີຂຶ້ນ

ໂດຍຫັນຈາກການຜະລິດແບບທຳມະຊາດ ຕາມມີຕາມເກີດ ພໍ່ໄດ້ຢູ່ໄດ້ກິນພາຍໃນຄອບຄົວ ຫັນມາປູກພືດໝູນວຽນ ເພື່ອເປັນສິນຄ້າ ໂດຍທ້າວ ຢົງສີ ເຮີ ໃຫ້ຮູ້ວ່າ: ຄອບຄົວຂອງຂ້າພະເຈົ້າແມ່ນຄອບຄົວໃຫຍ່ ເຊິ່ງມີສະມາຊິກທັງໝົດ 18 ຄົນ,ຍິງ 6 ຄົນ,ທັງໝົດນີ້ ມີແຮງງານຕົນຕໍ່ 8 ເເຮງງານ,ໃນເມື່ອກ່ອນ ຄອບຄົວໄດ້ ເຮັດນາ,ເຮັດໄຮ່,ປູກເຂົ້າໂພດ,ໝາກເດື່ອຍ ແລະ ມັນຕົ້ນ ປະສົມປະສານກັນ ແຕ່ເຫັນວ່າພືດເຫຼົ່ານັ້ນໃຊ້ເວລາດົນ ເມື່ອເກັບກູ້ຜົນຜະລິດແລ້ວເຫັນວ່າ:

ລາຍຮັບທີ່ໄດ້ຈາກການຂາຍ ບໍ່ໄດ້ຫຼາຍເທົ່າທີ່ຄວນ ສາເຫດກໍ່ຍ້ອນລາຄາບໍ່ແນ່ນອນ,ສະພາບດິນຟ້າອາກາດໃນບາງປີ ບໍ່ອຳນວຍຄວາມສະດວກ ແລະ ສັດຕູພືດທຳລາຍ ດັ່ງນັ້ນ,ຕົກມາປີ 2018 ໂດຍມີຫຼາຍຄອບຄົວ ຂອງກຸ່ມບ້ານນ້ຳເພີນປະກອບມີ:ບ້ານນາຍາວ,ບ້ານນາບົວ ແລະ ບ້ານໂນນຕ້ອງ ພ້ອມກັນທົດລອງປູກແຕງຫວານເຊິ່ງປີນີ້ ຄອບຄົວ ຂ້າພະເຈົ້າ ກໍ່ໄດ້ທົດລອງປູກໃນເນື້ອທີ່ປະມານ 1 ເຮັກຕາ,ເປັນດິນຂອງຕົນເອງ, ການປູກແມ່ນໄດ້ກະກຽມດິນ ໂດຍໃຊ້ລົດໄຖໃຫຍ່ໄຖເເປງດິນ ຈາກນັ້ນໄດ້ນຳແກ່ນລົງປູກ ໂດຍເວັ້ນໄລຍະຫ່າງຂອງຂຸມ 1,5 ແມັດ.

ແລ້ວກໍ່ຫົດນໍ້າໃສ່ຝຸ່ນໃນຊ່ວງທຳອິດ ຈາກນັ້ນກໍ່ອາໃສ່ນ້ຳຝົນຕາມລະດູການຫົດ ແລະ ໃສ່ປຸ່ຍໝາກ ພ້ອມບົວລະບັກຮັກສາ ຈົນກວ່າຈະໃຫ້ໝາກ ໃຊ້ເວລາປະມານ 2 ເດືອນກວ່າ ຈຶ່ງສາມາດເກັບໝາກແຕງອອກຂາຍໄດ້ ເເຕ່ເນື່ອງຈາກປີທຳອິດ ບົດຮຽນໃນການປູກຍັງບໍ່ຫຼາຍ ຈຶ່ງເຮັດໃຫ້ຜົນຜະລິດບໍ່ໄດ້ດີເທົ່າທີ່ຄວນ: ຜົນໄດ້ຮັບຈາກການຂາຍໝາກແຕງໃນປີທຳອິດນີ້ໄດ້ພຽງ 35 ລ້ານກວ່າກີບ,ປີ 2019 ປູກແຕງອີກຮອບໃໝ່ ໃນເນື້ອທີ່ 1,5 ເຮັກຕາ,ຂາຍໄດ້ 50 ລ້ານກວ່າກີບ ເມື່ອເຫັນວ່າລາຍຮັບຈາກການຂາຍໃນແຕ່ລະປີເພີມຂຶ້ນ ບວກໃສ່ຄວາມຕ້ອງການຂອງຜູ້ບໍລິໂພກ ແລະ ຕະຫຼາດກວ້າງອອກ ດັ່ງນັ້ນປີ 2020 ນີ້,ຕົນ ແລະ ຄອບຄົວຈຶ່ງໄດ້ຕັດສິນໃຈປູກແຕງຫວານເພີ່ມຂຶ້ນອີກເປັນເນື້ອທີ່ 2 ເຮັກຕາກວ່າ.


ທ້າວ ຢົງສີ ເຮີ ຍັງໃຫ້ຮູ້ຕື່ມອີກວ່າ: ໃນປີ 2020 ນີ້ຕົນ ແລະ ຄອບຄົວ ໄດ້ເລີ່ມປູກແຕງມາຕັ້ງແຕ່ເດືອນ ເມສາ ສຳລັບປີນີ້ ເຫັນວ່າຝົນຕົກດີກວ່າປີທີ່ຜ່ານມາ ຈຶ່ງເຮັດໃຫ້ເຄືອແຕງງາມ ໃຫ້ໝາກໃຫຍ່ ປະຈຸບັນນີ້ເດືອນ ກໍລະກົດແລ້ວ ຖືວ່າເປັນຊ່ວງທີ່ກຳລັງນຳເອົາແຕງອອກມາວາງຂາຍຕາມແຄມທາງ,ສົ່ງຂາຍຕະຫຼາດພາຍໃນເມືອງ ນອກຈາກນີ້ກໍ່ຍັງມີພໍ່ຄ້າ -ແມ່ຄ້າ ເດີນທາງມາຈາກນະຄອນຫຼວງ ແລະ ເມືອງໃກ້ຄຽງມາຮັບຊື້ກັບທີ່ ຊື້- ຂາຍແບບເໝົາຕາມຂະໜາດ,ໝາກໃຫຍ່ 1 ໝື່ນຕໍ່ລາຄາ 30,000 ກີບ,ໝາກກາງ 1 ໝື່ນຕໍ່ລາຄາ 25,000 ກີບ,ໝາກນ້ອຍ 15,000 ກີບ,

 

ລວມການຂາຍແຕ່ງໃນປີນີ້ 2020 ໄດ້ເຖິງ 70 ລ້ານກວ່າກີບ ,ນອກຈາກນີ້ ຄອບຄົວຂອງຕົນຍັງໄດ້ ມີລາຍຮັບຈາກການຂາຍເຂົ້ານາປີ,ເຂົ້າໄຮ່,ໝັນຕົ້ນ,ໝາກເດື່ອຍ ແລະ ສັດລ້ຽງຈຳນວນໜຶ່ງ ລວມລາຍຮັບພາຍໃນໜຶ່ງປີບໍ່ຕໍ່າກວ່າ 200 ລ້ານກີບ


ໂອກາດນີ່ທ່ານ ຢົງສີ ເຮີ ຍັງໄດ້ເວົ້າອີກວ່າ ຜົນຈາກຄວາມດຸໝັ່ນ,ປະຍັດອົດອອມ ຍັ້ນໝັ້ນໃນອາຊີບກະສິກຳ ມາຮອດປະຈຸບັນຄອບຄົວຂອງຕົນ ສາມາດເປັນຄອບຄົວທີ່ພົ້ນທຸກ ກາຍເປັນຄອບຄົວທີ່ມີລາຍຮັບໝັ້ນຄົງ ສາມາດສ້າງເຮືອນຢູ່ອາໃສ່ແບບຖາວອນ,ມີພະນະຮັບໃຊ້,ມີເງິນສົ່ງລູກຫຼານໃຫ້ໄດ້ເຂົ້າໂຮງຮຽນ,ມີເງິນປິ່ນປົວຕົນເອງ ແລະ ຄອບຄົວໃນຍາມເຈັບເປັນ ແລະ ຍັງມີເງິນທ້ອນແຮໄວ້ທະນາຄານຈຳນວນໜຶ່ງ ໂກກາດດຽວກັນນີ້ທ່ານກໍ່ໄດ້ຝາກເຖິງຜູ້ທີມີຄວາມສົນໃຈຢາກໄດ້ບົດຮຽນໃນການປູູກແຕງ ແລະ ພືດອື່ນໆ ກໍ່ສາມາດມາຖອດຖອນບົນຮຽນນຳຕົນໄດ້ .

ຂຽນໂດຍ: ແຫວນຄຳ
ພາບ+ວີດີໂອ: ຄຳເພັດ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031  

You may have missed