Wed. Oct 21st, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ພິທີປະກາດຮັບຮອງ ເມືອງຊະນະຄາມ ເປັນສະຫະພັນກໍາມະບານ 5 ເປັນເຈົ້າ

1 min read

ໃນຕອນເຊົ້າ ວັນທີ 19 ທັນວາ 2019 ທີ່ຜ່ານນີ້, ຢູ່ທີ່ສະໂມສອນເມືອງຊະນະຄາມ ແຂວງວຽງຈັນ, ໄດ້ຈັດພິທີປະກາດຮັບຮອງເມືອງຊະນະຄາມ ເປັນສະຫະພັນກໍາມະບານ 5 ເປັນເຈົ້າຂຶ້ນ, ໂດຍພາຍໃຕ້ການເປັນປະທານຮ່ວມຂອງທ່ານ ສະໝານ ວິເສດຍະພົງສ໌ ເລຂາພັກເມືອງ ເຈົ້າເມືອງໆຊະນະຄາມ, ທ່ານ ນາງ ຈັນເພັດ ມະນີແສງ ຮອງກົມຂະບວນການແຂ່ງຂັນ ແລະ ຍ້ອງຍໍ ສູນກາງສະຫະພັນກໍາມະບານ ແລະທ່ານ ນາງ ບຸນຄໍ້າ ສີສຸທໍາ ຮອງປະທານສະຫະພັນກໍາມະບານແຂວງວຽງຈັນ, ມີບັນດາທ່ານໃນຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ແຂກຖືກເຊີນ, ບັນດາຄະນະບໍລິຫານງານສະຫະພັນກໍາມະບານຮາກຖານ, ສະມາຊິກກໍາມະບານ ແລະ ນ້ອງນ້ອຍນັກຮຽນເຂົ້າຮ່ວມຢ່າງພ້ອມພຽງ.

ທ່ານ ສຸກສະຫວັນ ສິງອາໄພ ປະທານສະຫະພັນກໍາມະບານເມືອງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານເມືອງຊະນະຄາມສົກປີ 2017- 2019 ແລະ ທິດທາງແຜນການແຂ່ງຂັນ 2020-2024 ຂຶ້ນ, ຜ່ານການຈັດຕັ້ງປະຕິບັດຂໍ້ແຂ່ງຂັນດັ່ງກ່າວໃນໄລຍະ 3 ປີຜ່ານມາສາມາດສະຫຼຸບຕີລາຄາດ້ານດີ, ດ້ານອ່ອນ, ຜົນໄດ້ຮັບ, ບັນດາຂໍ້ຄົງຄ້າງຕ່າງໆ ເຊິ່ງສາມາດສະຫຼຸບໄດ້ຄື: ສະຫະພັນກໍາມະບານເມືອງຊະນະຄາມ ໄດ້ເອົາໃຈໃສ່ໃນການຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ ເປັນເສນາທິການໃຫ້ແກ່ຄະນະປະຈໍາພັກເມືອງ ແລະ ຄະນະບໍລິຫານງານສະຫະພັນກໍາມະບານແຂວງວຽງຈັນ, ມີຄະນະບໍລິຫານງານທັງໝົດ 15 ສະຫາຍ, ຍິງ 04ສະຫາຍ, ຄະນະປະທານ 02 ສະຫາຍ, ຍິງ 01 ສະຫາຍ, ມີສະມາຊິກກໍາມະບານທັງໝົດ 683 ສະຫາຍ, ຍິງ 286 ສະຫາຍ, ມີສະມາຊິກກອງທຶນທານຸເຄາະ ແລະ ກອງທຶນຊ່ວຍເຫຼືອເຊິ່ງກັນ ແລະ ກັນທັງໝົດ 823 ສະຫາຍ, ຍິງ 322 ສະຫາຍ, ທົ່ວເມືອງມີ 47 ກໍາມະບານຮາກຖານ.

ສະພາບການເຄື່ອນໄຫວວຽກງານເນື້ອໃນຂໍ້ແຂ່ງຂັນ 5 ເປັນເຈົ້າ ໃນໄລຍະຜ່ານມາ ໄດ້ເອົາໃຈໃສ່ນໍາເອົາເນື້ອໃນຈິດໃຈກ່ຽວກັບວຽກງານດັ່ງກ່າວ ໄປຈັດຕັ້ງຜັນຂະຫຍາຍຕາມເຂດຄວາມຮັບຜິດຊອບຂອງຕົນຢ່າງເປັນເຈົ້າການ ໂດຍຕິດພັນກັບຂະບວນຮັກຊາດ ແລະ ພັດທະນາ, ການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະຕິດພັນກັບວຽກງານວິຊາສະເພາະຂອງແຕ່ລະຫ້ອງການ, ເປັນເຈົ້າການໃນການລົງໂຄສະນາສຶກສາອົບຮົມການເມືອງ-ແນວຄິດ, ເອົາໃຈໃສ່ໃນການປັບປຸງແບບແຜນວິທີນໍາພາ, ວິທີເຮັດວຽກ ແລະ ການຂະຫຍາຍການຈັດຕັ້ງ, ເປັນເຈົ້າໃນການປົກປ້ອງສິດຜົນປະໂຫຍດອັນຊອບທໍາຂອງພະນັກງານ, ສະມາຊິກກໍາມະບານ, ກໍາມະກອນຊາວຜູ່ອອກແຮງງານ, ເຊິ່ງໄລຍະຜ່ານມາສາມາດຂະຫຍາຍສະມາຊິກກອງທຶນໄດ້ທັງໝົດ 143 ສະຫາຍ, ໄດ້ຮັບເງີນກອງທຶນທັງໝົດ 715,587,000ກີບ, ປະຕິບັດນະໂຍບາຍຕໍ່ສະມາຊິກລວມ 134 ຄົນ, ເປັນເງິນ 186,300,000 ກີບ, ປະຕິບັດຕໍ່ຄອບຄົວສະມາຊິກທີ່ເສຍຊີວິດຈໍານວນ 7 ສະຫາຍ, ເປັນເງິນ 52,928,700 ກີບ, ເປັນເຈົ້າການໃນການເຂົ້າຮ່ວມໃນການຕິດຕາມກວດກາ, ຄຸ້ມຄອງເສດຖະກິດ-ສັງຄົມ ແລະ ເປັນເຈົ້າການຈັດຕັ້ງປະຕິບັດແນວທາງການຕ່າງປະເທດຕາມແນວທາງຂອງພັກໄດ້ເປັນຢ່າງດີ.

ເພື່ອເປັນການສືບຕໍ່ການປະຕິບັດເນື້ອໃນແຂ່ງຂັນ 5 ເປັນເຈົ້າໃນຕໍ່ໜ້າໃຫ້ມີຄວາມໜັກແໜ້ນ ແລະ ຮັກສາໄດ້ມູນເຊື້ອດັ່ງກ່າວ ແມ່ນຈະໄດ້ສືບຕໍ່ເປັນເຈົ້າການໃນການສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກກໍາມະບານ, ຂະ ຫຍາຍວຽກງານລົງສູ່ຮາກຖານໃຫ້ເປັນຂະບວນກວ້າງຂວາງ ແລະ ຖືເອົາວຽກງານຂະບວນການແຂ່ງຂັນ 5 ເປັນເຈົ້າຕິດພັນກັບທຸກຂົງເຂດວຽກງານ ແລະ ເປັນໜ້າທີ່ການເມືອງຂອງສະມາຊິກແຕ່ລະສະຫາຍ.

ໃນພິທີອັນມີຄວາມໝາຍຄວາມສໍາຄັນດັ່ງກ່າວ, ໄດ້ມີພິທີການມອບ-ຮັບໃບຍ້ອງຍໍຂອງສະຫະພັນກໍາມະບານແຂວງວຽງຈັນ ແລະ ຂອງສະຫະພັນກໍາມະບານສູນກາງໃຫ້ແກ່ບຸກຄົນ ແລະ ກົມກອງລວມໝູ່, ການມອບ-ຮັບທຸງໄຊຂອງປະທານສະຫະພັນແຂວງວຽງຈັນ ມອບໃຫ້ສະຫະພັນເມືອງຊະນະຄາມ ແລະ ການປະດັບຫຼຽນກາກໍາມະບານຂອງປະທານສູນກາງສະຫະພັນກໍາມະບານລາວຂຶ້ນ ໂດຍການເປັນກຽດຂຶ້ນປະດັບຫຼຽນກາໃນຄັ້ງນີ້ຂອງທ່ານ ນາງຈັນເພັດ ມະນີແສງ ຮອງກົມຂະບວນການແຂ່ງຂັນ ແລະ ຍ້ອງຍໍ ສູນກາງສະຫະພັນກໍາມະບານ.

ຈາກນັ້ນ ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມ ແລະ ມີທິດຊີ້ນໍາຈາກຄະນະປະທານ, ພ້ອມທັງໄດ້ນໍາພາຜູ່ແທນກອງປະຊຸມເຂົ້າສູ່ພິທີລັ່ນຄ້ອງ, ເປີດປ້າຍ ແລະ ປ່ອຍລູກໂປ່ງ, ເພື່ອຮ່ວມເປັນສັກຂີພິຍານໃນການປະກາດເມືອງຊະນະຄາມ ເປັນເມືອງສະຫະພັນກໍາມະບານ 5 ເປັນເຈົ້າຢ່າງເປັນທາງການ.

ຂ່າວ: ສະຫຼິງ ເມືອງຊະນະຄາມ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031  

You may have missed