Thu. Oct 22nd, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ແຂວງວຽງຈັນ ເປີດກອງປະຊຸມຄະນະກຳມະການຄຸ້ມຄອງສິ່ງແວດລ້ອມ ຂັ້ນແຂວງ ປະຈຳປີ 2019.

1 min read

ເພື່ອເປັນການຄຸ້ມຄອງວຽກງານ ສິ່ງແວດລ້ອມຂອງບັນດາໂຄງການລົງທຶນ ແລະ ກິດຈະການຕ່າງໆ ໃນທົ່ວແຂວງ ວຽງຈັນ, ໂດຍສະເພາະແມ່ນການສ້າງຄວາມເຂັ້ມແຂງ ທາງດ້ານວິຊາການໃຫ້ແກ່ພະນັກງານສິ່ງແວດລ້ອມແຂວງເມືອງ ແລະ ຂະແໜງການກ່ຽວຂ້ອງ, ໃນການບັງຄັບໃຊ້ກົດໝາຍ ຕໍ່ບັນດາໂຄງການລົງທຶນ ທີ່ບໍ່ປະຕິບັດພັນທະດ້ານສິ່ງແວດລ້ອມ, ບໍ່ໄດ້ສຶກສາຜົນກະທົບຕໍ່ສິ່ງແວດລ້ອມ ແລະ ໂຄງການທີ່ບໍ່ທັນມີໃບຢັ້ງຢືນດ້ານສິ່ງແວດລ້ອມ.

ໃນຕອນເຊົ້າມື້ນີ້ ວັນທີ 25 ທັນວາ 2019, ກອງປະຊຸມຄະນະກຳມະການຄຸ້ມຄອງສິ່ງແວດລ້ອມ ຂັ້ນແຂວງ ປະຈຳປີ 2019 ໄດ້ໄຂຂື້ນທີ່ຫ້ອງປະຊຸມເບີ2 ຫ້ອງວ່າການປົກຄອງແຂວງວຽງຈັນ, ໂດຍພາຍໃຕ້ການເປັນປະທານຂອງທ່ານ ດາວເຮືອງ ນັນທະວົງ ຮອງເຈົ້າແຂວງ ວຽງຈັນ ທັງເປັນປະທານ ຄະນະກຳມະການ ຄຸ້ມຄອງສິ່ງແວດລ້ອມ ແຂວງວຽງຈັນ, ມີບັນດາຫົວໜ້າພະແນກ, ຄະນະພະແນກ, ຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ ໃນທົ່ວແຂວງ, ກຳມະການຄຸ້ມຄອງສິ່ງແວດລ້ອມຂັ້ນແຂວງ ເຂົ້າຮ່ວມ.

ທ່ານ ດາວເຮືອງ ນັນທະວົງ ຮອງເຈົ້າແຂວງວຽງຈັນ ກ່າວເປີດກອງປະຊຸມຄັ້ງນີ້ວ່າ :

“ ກອງປະຊຸມໃນຄັ້ງນີ້ ນອກຈາກຈະເປັນການສະຫຼຸບຜົນການເຄື່ອນໄຫວວຽກງານການຄຸ້ມຄອງສິ່ງແວດລ້ອມ ຂອງໂຄງການລົງທຶນ ແລະ ກິດຈະການຕ່າງໆ ໃນປີ 2019 ຜ່ານມາ ແລະ ກໍານົດທິດທາງແຜນການໃນປີ 2020 ແລ້ວ, ຜູ້ແທນກອງປະຊຸມທັງໝົດຍັງຈະໄດ້ຄົ້ນຄວ້າ, ປຶກສາຫາລື ແລກປ່ຽນຄຳຄິດຄໍາເຫັນ ຕໍ່ຄຳຖາມເຈາະຈີ້ມຕ່າງໆ ເຊັ່ນ:

ມາດຕະການແກ້ໄຂ ບັນດາໂຄງການລົງທຶນ ແລະ ກິດຈະການຕ່າງໆ ທີ່ຍັງບໍ່ທັນມີໃບຢັ້ງຢືນຮັບຮອງດ້ານສິ່ງແວດລ້ອມ , ຄວາມຈຳເປັນໃນການສ້າງແຜນຄຸ້ມຄອງດ້ານສິ່ງແວດລ້ອມ ໂຄງການກໍ່ສ້າງ ແລະ ປັບປຸງເສັ້ນທາງເລກທີ 4501 ( ເມືອງຫີນເຫີບ – ເມືອງ ຊະນະຄາມ ) , ຄວາມຈໍາເປັນໃນການລົງຢ້ຽມຢາມ, ຕິດຕາມ ແລະ ຊຸກຍູ້ໃຫ້ໂຄງການພັດທະນາ ປະຕິບັດພັນທະ ດ້ານສິ່ງແວດລ້ອມຂອງ ຄະນະກໍາມະການຄຸ້ມຄອງສິ່ງແວດລ້ອມ “

 

ທ່ານ ບຸນທະວີ ຈັນທະວົງ ກອງເລຂາ ຄະນະກຳມະການຄຸ້ມຄອງສິ່ງແວດລ້ອມ ແຂວງວຽງຈັນ ນຳສະເໜີບົດສະຫຼຸບວຽກງານ ການຄຸ້ມຄອງສິ່ງແວດລ້ອມໂຄງການລົງທຶນ ແລະ ກິດຈະການຕ່າງໆ ປະຈຳປີ 2019 ແລະ ແຜນການ ປະຈຳປີ 2020.

ປະຈຸບັນ ທົ່ວແຂວງ ວຽງຈັນ ມີໂຄງການລົງທຶນທັງໝົດ ທີ່ໄດ້ປະຕິບັດຕາມລະບຽບກົດໝາຍດ້ານສິ່ງແວດລ້ອມ ຈໍານວນ 2,121 ໂຄງການ. ເຊິ່ງໃນນັ້ນ, ໂຄງການລົງທຶນຂະໜາດໃຫຍ່ ທີ່ໄດ້ຮັບໃບຢັ້ງຢືນດ້ານສິ່ງແວດລ້ອມຈາກສູນກາງ 16 ໂຄງການ, ໂຄງການລົງທຶນຂະໜາດນ້ອຍ ທີ່ໄດ້ຮັບໃບຢັ້ງຢືນຢູ່ຂັ້ນແຂວງ 189 ໂຄງການ ແລະ ຫົວໜ່ວຍທຸລະກິດ ແບບຄອບຄົວ ທີ່ໄດ້ຮັບໃບຢັ້ງຢືນດ້ານສິ່ງແວດລ້ອມ ຢູ່ຂັ້ນເມືອງ 1,916 ກິດຈະການ, ປະຈຸບັນທົ່ວແຂວງ ຍັງມີໂຄງການລົງທຶນ ແລະ ກິດຈະການຕ່າງໆ ຈໍານວນ 37 ຫົວໜ່ວຍ ຍັງບໍ່ທັນມີໃບຢັ້ງຢືນດ້ານສິ່ງແວດລ້ອມ, ເຊິ່ງເປັນບັນຫາທີ່ຍັງຄ້າງຄາ ເຊິ່ງຄະນະກໍາມະການຄຸ້ມຄອງສິ່ງແວດລ້ອມແຂວງ ກໍ່ຄືທິມງານກອງເລຂາຄະນະກໍາມະການ ຈະຕ້ອງໄດ້ສືບຕໍ່ແກ້ໄຂ ໝົດປີ 2020 ຈະຕ້ອງເຮັດແນວໃດໃຫ້ບັນດາໂຄງການລົງທຶນ ແລະ ກິດຈະການຕ່າງໆ ທັງໝົດມີໃບຢັ້ງຢືນດ້ານສິ່ງແວດລ້ອມເພີ່ມຂື້ນເຖິງ 90% ຂື້ນໄປ.

 

ໃນວາລະກອງປະຊຸມ ຜູ້ເຂົ້າຮ່ວມກອງປະຊຸມ ຍັງໄດ້ພ້ອມກັນຍົກຂື້ນມາປຶກສາຫາລື ປະກອບຄໍາຄິດຄຳເຫັນ ຊອກຫາແນວທາງໃນການແກ້ໄຂ ເພື່ອແນໃສ່ ເຮັດໃຫ້ວຽກງານຄຸ້ມຄອງສິ່ງແວດລ້ອມຂອງໂຄງການລົງທຶນ ແລະ ກິດຈະການຕ່າງໆ ຢູ່ໃນແຂວງ ວຽງຈັນ ໃຫ້ມີປະສິດທິພາບດີຂື້ນເທື່ອລະກ້າວ.

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031