Fri. Sep 18th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ເມືອງກາສີ ເປີດກອງປະຊຸມເຊື່ອມຊຶມ ແລະ ແນະນໍາການປະເມີນຜົນວຽກງານສາມສ້າງ

1 min read

ເມືອງກາສີ ເປີດກອງປະຊຸມເຊື່ອມຊຶມ ແລະ ແນະນໍາການປະເມີນຜົນວຽກງານສາມສ້າງ .


ປະຊຸມດັ່ງກ່າວແມ່ນໄດ້ຈັດຂຶ້ນໃນວັນທີ່ 25 ສິງຫາ 2020 ນີ້, ຢູ່ທີ່ສະໂມສອນ ຂອງເມືອງກາສີ ແຂວງວຽງຈັນ.

ໂດຍການເປັນປະທານຂອງທ່ານ ສີທົນ ແສງພະຈັນ ເລຂາພັກເມືອງ ເຈົ້າເມືອງໆກາສີ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ – ຮອງຫົວໜ້າຫ້ອງການ ພ້ອມດ້ວຍພະນັກງານວິຊາການຂະແໜງການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.


ໃນໂອກາດດັ່ງກ່າວ ທ່ານ ສີທົນ ແສງພະຈັນ ເຈົ້າເມືອງໆກາສີ ກໍ່ໄດ້ໃຫ້ກຽດຂຶ້ນກ່າວເປີດ ກອງປະຊຸມ ເຊີ່ງທ່ານໄດ້ໃຫ້ຮູ້ວ່າ: ກອງປະຊຸມໃນຄັ້ງນີ້ແມ່ນຈະໄດ້: ພ້ອມກັນສ້າງຄວາມເປັນເອກະພາບກັນໃນບັນດາສະຫາຍຄະນະພັກ, ຄະນະຫ້ອງການ, ອົງການຂັ້ນເມືອງ ແລະ ບ້ານໃນການປະເມີນຜົນການຈັດຕັ້ງປະຕິບັດວຽກງານ 3 ສ້າງຢູ່ເມືອງກາສີ ໃນໄລຍະຜ່ານມາ,

ອີກຢ່າງໜື່ງກອງປະຊຸມຍັງຈະໄດ້ຄົ້ນຄ້ວາການກໍານົດເປົ້າໝາຍ ແລະ ທິດທາງໃນການຜັນຂະຫຍາຍວຍກງານ 3 ສ້າງໃນຕໍ່ໜ້າ ຕາມວິໄສທັດ ຮອດປີ 2030 ນອກຈາກນີ້ ກໍຍັງຈະໄດ້ພ້ອມກັນຄົ້ນຄ້ວາແລກປ່ຽນບົດຮຽນກ່ຽວກັບການສືບຕໍ່ປະຕິບັດວຽກງານ 3 ສ້າງຕາມເນື້ອໃນຈິດໃຈຂອງມະ ຕິເລກທີ 25/ກມສພ, ຄໍາສັ່ງເລກທີ່ 34/ນຍ ວ່າດ້ວຍ: ທິດທາງ, ເປົ້າໝາຍ ແລະ ມາດຕະການ ໃນການຈັດຕັ້ງປະຕິບັດວຽກງານ 3 ສ້າງໃນທົ່ວປະເທດ, ແຈ້ງການເລກທີ 05/ພນ ແລະ ແບບຟອມການປະເມີນວຽກງານ 3 ສ້າງ. ພ້ອມນີ້ທ່ານ ກໍ່ໄດ້ຮຽກຮ້ອງໃຫ້ທຸກທ່ານທີ່ເຂົ້າຮ່ວມກອງປະຊຸມຈົ່ງຕັ້ງໜ້າຄົ້ນຄ້ວາປະກອບຄໍາເຫັນ, ຮ່ຳຮຽນ ແລະ ທອດຖອນບົດຮຽນເຊີ່ງກັນ ແລະ ກັນຢ່າງມີປະສິດທິຜົນ,

ແນໃສ່ສ້າງເງື່ອນໄຂປັບປຸງບູລະນະອົງການບໍລິຫານລັດໃຫ້ເຂັ້ມແຂງ. ຫຼັງຈາກນັ້ນທ່ານ ໜູພາບ ອິທະມາລີ ຮັກສາການຫົວໜ້າຫ້ອງການພາຍໃນເມືອງ ກໍໄດ້ຂຶ້ນຜ່ານບົດລາຍງານການຈັດຕັ້ງປະຕິບັດວຽກງານ 3 ສ້າງຢູ່ເມືອງກາສີຄື: ໃນທົ່ວເມືອງກາສີມີທັງໝົດ 50 ບ້ານ, ມີ 6 ກຸ່ມບ້ານໃນນີ້ມີ 2 ຈຸດສຸມພັດທະນາຄື, ມີ 7.573 ຫຼັງຄາເຮືອນ, ມີ 6.741 ຄອບຄົວ, ມີພົນລະເມືອງທັງໝົດ 41.791 ຄົນ, ຍິງ 21.224 ຄົນ, ໃນນີ້ເມືອງກາສີໄດ້ກໍານົດເອົາ 5 ບ້ານເປັນບ້ານການຈັດຕັ້ງປະຕິບັດວຽກງານ 3 ສ້າງ; ເມືອງກາສີກໍເປັນເມືອງໜື່ງທີ່ໄດ້ເອົາໃຈໃສ່ຈັດຕັ້ງຜັນຂະຫຍາຍມະຕິ, ຄໍາສັ່ງ ທີ່ຂັ້ນເທີງວາງອອກໃຫ້ເປັນຮູບປະທໍາໂດຍໄດ້ຈັດຕັ້ງຜັນຂະຫຍາຍວຽກງານ 3 ສ້າງເຂົ້າສູ່ລ່ວງເລິກ ແລະ ຫັນວຽກດັ່ງກ່າວໃຫ້ເປັນຄວາມຮັບຜິດຊອບຂອງຂະແໜງການແຕ່ລະຂັ້ນ, ພ້ອມກັນນັ້ນ ກໍ່ໄດ້ອອກຂໍ້ຕົກລົງຂອງເມືອງ ກ່ຽວກັບການມອບຄວາມຮັບຜິດຊອບຈັດຕັ້ງປະຕິບັດແຕ່ລະຕົວຊີ້ບອກໃນດ້ານຕ່າງໆ ໃຫ້ແຕ່ລະພາກສ່ວນຂັ້ນເມືອງ ແລະ ບ້ານ ເຊີ່ງໃນໄລຍະ 1 ປີຜ່ານມາ: ຄະນະພັກ ອົງການປົກຄອງເມືອງໄດ້ເອົາໃຈໃສ່ ຊີ້ນໍາໆພາ ຈັດຕັ້ງປະຕິບັດວຽກງານສາມສ້າງຂັ້ນເມືອງ ແລະ ຂັ້ນບ້ານ.

ການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ໂດຍໄດ້ເລ່ງໃສ່ 5 ດ້ານຄື: ດ້ານການກໍ່ສ້າງພັກ-ພະນັກງານ, ດ້ານການປົກຄອງ ແລະຄຸ້ມຄອງບໍລິຫານ, ດ້ານເສດຖະກິດ, ດ້ານວັດທະນະທຳ-ສັງຄົມ ແລະ ດ້ານປ້ອງກັນຊາດ-ປ້ອງກັນຄວາມສະຫງົບ

ຄຽງຄູ່ກັນນັ້ນການສ້າງບ້ານເປັນຫົວໜ່ວນພັດທະນາ ໄດ້ສຸມໃສ່ 4 ດ້ານ ເປັນຕົ້ນແມ່ນ ດ້ານລະບົບການເມືອງ-ການປົກຄອງ, ດ້ານການສົ່ງເສີມການຜະລິດເປັນສິນຄ້າ ແລະ ການບໍລິການ, ດ້ານວັດທະນະທຳ-ສັງຄົມ ແລະ ດ້ານວຽກງານປ້ອງກັນຊນດ-ປ້ອງກັນຄວ່ມສະຫງົບ. ຈາກນັ້ນທ່ານ ອໍາພອນ ສາວະບຸດ ກຳມະການພັກເມືອງ ຫົວໜ້າຫ້ອງວ່າການເມືອງກາສີ ກໍ່ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າເມືອງໆກາສີ ສະບັບເລກທີ 216/ຈມກສ ລົງວັນທີ 15 ກໍລະກົດ 2020 ວ່າດ້ວຍການແຕ່ງຕັ້ງຄະນະກໍາມະການປະເມີນຜົນການ ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ແລະ ຜ່ານຂໍ້ຕົກລົງຂອງທ່ານເຈົ້າເມືອງໆກາສີ ສະບັບເລກທີ 256/ຈມກສ ວ່າດ້ວຍ ການແບ່ງຄວາມຮັບຜິດຊອບການປະເມີນຜົນສ້າງເມືອງເປັນຫົວໜ່ວຍເຂັ້ມແຂງຮອບດ້ານ ຕາມ 5 ດ້ານ, 47 ຕົວຊີ້ບອກ ແລະ ສ້າງບ້ານເປັນຫົວໜ່ວຍພັດທະນາ ຕາມ 4 ດ້ານ, 30 ຕົວຊີ້ບອກ ພ້ອມນັ້ນທ່ານ ຄໍາອ້ວນ ສຸວັນທອງ ກໍາມະການພັກເມືອງ ຮອງເຈົ້າເມືອງໆກາສີ ກໍໄດ້ຂຶ້ນຜ່ານບົດແນະນໍາຂອງທ່ານເຈົ້າເມືອງໆກາສີ ສະບັບເລກທີ່ 257/ຈມກສ ລົງວັນທີ 24 ສິງຫາ 2020 ວ່າດ້ວຍ ການຈັດຕັ້ງປະຕິບັດປະເມີນຜົນວຽກງານ 3 ສ້າງ. ກອງປະຊຸມຍັງໄດ້ມີການປະກອບຄໍາຄິດຄໍາເຫັນ ແລກປ່ຽນບົດຮຽນຕໍ່ບັນດາຕົວຊີ້ບອກຕ່າງໆໃຫ້ມີຄວາມເຂົ້າໃຈຢ່າງເລິກເຊີ່ງເພື່ອນໍາໄປຈັດຕັ້ງປະຕິບັດໃຫ້ຖືກຕ້ອງ.

ໃນຕອນທ້າຍ ທ່ານເຈົ້າເມືອງໆກາສີ ກໍ່ໄດ້ໃຫ້ກຽດມີຄໍາເຫັນໂອ້ລົມເຊີ່ງທ່ານກໍ່ໄດ້ຮຽກຮ້ອງໃຫ້ບັນດາທ່ານທີ່ເຂົ້າຮ່ວມປະຊຸມຈົ່ງນໍາເອົາເນື້ອໃນຈິດໃຈຂອງກອງປະຊຸມນີ້ ໄປປຶກສາຫາລືພາຍໃນໝູ່ຄະນະເພື່ອໃຫ້ມີຄວາມເປັນເອກະພາບໃນການຈັດຕັ້ງປະຕິບັດວຽກງານດັ່ງກ່າວໃຫ້ສໍາເລັດຕາມວັນເວລາທີ່ຂັ້ນເທິງໄດ້ກໍານົດໄວ້. ສໍາລັບການປະເມີນກໍ່ແມ່ນໃຫ້ເກັບກໍາຂໍ້ມູນລະອຽດຖືກຕ້ອງສອດຄ່ອງກັບຄວາມເປັນຈິງຕາມແຕ່ລະທ້ອງຖິ່ນ.

ຂ່າວ: ເມືອງກາສີ.

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

September 2020
M T W T F S S
 123456
78910111213
14151617181920
21222324252627
282930