Thu. Oct 1st, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ພະນັກງານ-ລັດຖະກອນ ທົ່ວເມືອງກາສີ ໄດ້ຮັບຟັງການເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 9

1 min read

ພະນັກງານ-ລັດຖະກອນ ທົ່ວເມືອງກາສີ ໄດ້ຮັບຟັງການເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VIII ແລະ ກອງປະຊຸມສະໄໝສາມັນເທື່ອທີ 9 ສະພາປະຊາຊົນແຂວງວຽງຈັນ ຊຸດທີ I.


ໃນວັນທີ 28 ສິງຫາ 2020 ຢູ່ທີ່ສະໂມສອນເມືອງກາສີ ແຂວງວຽງຈັນ ໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ແລະ ຜົນສຳເລັດກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງວຽງຈັນ ຊຸດທີ I. ໂດຍການໃຫ້ກຽດເຂົ້າຮ່ວມຮັບຟັງຂອງ ທ່ານ ອຳໄພ ໂສລັດຕະນະວົງ ຮອງເລຂາພັກເມືອງ, ມີຄະນະປະຈຳພັກເມືອງ,

ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ທະຫານ-ຕຳ ຫຼວດ, ພະນັກງານ-ລັດຖະກອນ ເຂົ້າຮ່ວມຮັບຟັງຢ່າງພ້ອມພຽງ.

ໃນໂອກາດດັ່ງກ່າວ ທ່ານ ອຳພອນ ສາວະບຸດ ກຳ ມະການພັກເມືອງ ຫົວໜ້າຫ້ອງວ່າການເມືອງກາສີ ໄດ້ຂື້ນລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການວຽກງານ 6 ເດືອນທ້າຍປີ 2020,

ຫຼັງຈາກນັ້ນ ທ່ານ ນ ແສງເດືອນ ພູນສະຫວັດ ກໍ່ໄດ້ໃຫ້ກຽດເຜີຍແຜ່ເອກະສານຜົນສຳເລັດກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງວຽງຈັນຊຸດທີ I, ເຊີ່ງກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ 6 ເດືອນຕົ້ນປີ

ແລະ ທິດທາງແຜນວຽກຈຸດສຸມ 6 ເດືອນທ້າຍປີ 2020, ກອງປະຊຸມໄດ້ຮັບຟັງການລາຍງານຂອງພະແນກກະສິກຳ ແລະ ປ່າໄມ້ ກ່ຽວກັບການຕີລາຄາຜົນກະທົບຈາກໄພພິບັດທຳມະຊາດ, ການແຜ່ລະບາດຂອງພະຍາດໂຄວິດ 19 ຕໍ່ການຜະລິດກະສິກຳ ແລະ ບັນດາຄາດໝາຍສູ້ຊົນ, ຮັບຟັງການລາຍງານ ແລະ ປະກອບຄຳເຫັນໃສ່ບົດສະຫຼຸບການເຄື່ອນໄຫວວຽກງານຂອງສະພາປະຊາຊົນແຂວງຊຸດທີ I ໃນ 6 ເດືອນຕົ້ນປີ ແລະ ທິດທາງແຜນວຽກຈຸດສຸມ 6 ເດືອນທ້າຍປີ 2020 ຄຽງຄູ່ກັນນັ້ນ

ໃນໄລຍະດຳເນີນກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງວຽງຈັນຊຸດທີ I ໄດ້ມີປະຊາຊົນສົ່ງຄຳຄິດເຫັນຜ່ານໂທລະສັບສາຍດ່ວນທັງໝົດ 20 ສາຍ, ມີ 10 ເລື່ອງເຊິ່ງພົວພັນເຖິງການຄຸ້ມຄອງລັດ-ຄຸ້ມຄອງເສດຖະກິດ-ສັງຄົມ ໃນນີ້ບັນຫາທີ່ພົ້ນເດັ່ນແມ່ນພົວພັນເຖິງການທົດແທນທີ່ດິນຄືນໃຫ້ແກ່ປະຊາຊົນຈາກການຈັດສັນທີ່ດິນເທດສະບານແຂວງ, ບັນຫານ້ຳໃຊ້ເພື່ອການດຳລົງຊີວິດ ແລະໃຊ້ເພື່ອທຳການຜະລິດ ຢູ່ບ້ານສົມສະຫວາດ ເມືອງວັງວຽງ ທີ່ໂຄງການລົດໄຟ ແລະ ທາງດ່ວນຜ່ານ,

ຈາກນັ້ນທ່ານ ສົມດີ ແກ້ວດາລາວິນ ກຳມະການພັກແຂວງ ຮອງປະທານສະພາປະຊາຊົນແຂວງວຽງຈັນ ໄດ້ຂື້ນຜ່ານເອກະສານຜົນສຳເລັດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ເຊີ່ງກອງປະຊຸມໄດ້ພິຈາລະນາຮັບຮອງເອົາບັນຫາສຳຄັນພື້ນຖານຂອງປະເທດຊາດຄື: ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງີນຕາ 05 ເດືອນ ຄາດຄະເນ 06 ເດືອນຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ 2020, ຮັບຮອງເອົາການປັບປຸງກົດໝາຍຈຳນວນ 05 ສະບັບຄື: ກົດໝາຍວ່າດ້ວຍ: ພາສີ; ກົດໝາຍວ່າດ້ວຍ: ສະພາແຫ່ງຊາດ; ກົດໝາຍວ່າດ້ວຍ: ສະພາປະຊາຊົນຂັ້ນແຂວງ; ກົດໝາຍວ່າດ້ວຍ: ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນແຂວງ; ກົດໝາຍວ່າດ້ວຍ: ນ້ຳ ແລະ ຊັບພະຍາກອນນ້ຳ ແລະ ກົດໝາຍວ່າດ້ວຍ: ການປົກປັກຮັກສາສີ່ງແວດລ້ອມ.

ຮັບຮອງເອົາການເລືອກຕັ້ງແທນກຳມະການຄະນະປະຈຳສະພາແຫ່ງຊາດ ແລະ ແຕ່ງຕັ້ງປະທານກຳມາທິການແຜນການ-ການເງີນ ແລະ ກວດສອບສະພາແຫ່ງຊາດ ແລະ ຮັບຮອງເອົາບົດລາຍງານຜົນການຕິດຕາມກວດກາການຈັດຕັ້ງປະຕິບັດກົດໝາຍກ່ຽວກັບການຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດ (ການຊອກຄົ້ນສໍາຫຼວດ,ຂຸດຄົ້ນ ແລະ ປຸງແຕ່ງແຮ່ທາດ, ຫີນຜາ, ຫີນແຮ່ ແລະ ຊາຍ). ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ສະພາແຫ່ງຊາດໄດ້ສະເໜີໃຫ້ 05 ພາກສ່ວນປະກອບດ້ວຍກະຊວງການເງີນ,ກະຊວງແຜນການ ແລະ ການລົງທືນ, ກະຊວງກະສິກຳ ແລະ ປ່າໄມ້, ກະຊວງແຮງງານ ແລະ ສະຫວັດດີການສັງຄົມ ແລະ ທະນາຄານແຫ່ງ ສປປລາວ ຂື້ນຊີ້ແຈງຕໍ່ຄຳຊັກຖາມທີ່ໄດ້ຍົກຂື້ນຢູ່ໃນກອງປະຊຸມເປັນຕົ້ນສະພາບການພັດທະນາເສດຖະກິດ-ສັງຄົມໃນເງື່ອນໄຂທີ່ໄດ້ຮັບຜົນກະທົບຈາກການເກີດລະບາດຂອງພະຍາດໂຄວິດ19, ການສ້າງວຽກເຮັດງານທຳ ເພື່ອຮັບຮອງເອົາແຮງງານລາວ ທີ່ກັບມາຈາກຕ່າງປະເທດ, ການສົ່ງເສີມການຜະລິດກະສິກຳເພື່ອຮັບປະກັນໃຫ້ການບໍລິໂພກພາຍໃນ ແລະ ສົ່ງອອກ, ບັນຫາການສົ່ງເສີມການຜະລິດຂະໜາດນ້ອຍຂະໜາດກາງ, ບັນຫາການຄິດໄລ່ລາຄາໄຟຟ້າທີ່ມີລາຄາສູງ, ບັນຫາການແລກປ່ຽນເງີນຕາຕ່າງປະເທດ ແລະ ບັນຫາອື່ນໆ ອີກຈຳນວນໜື່ງ.

ພ້ອມກັນນັ້ນກອງປະຊຸມຍັງໄດ້ຮັບຟັງ ແລະ ປະກອບຄຳເຫັນຕໍ່ບົດລາຍງານການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການເຄື່ອນໄຫວວຽກງານຮອດກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທີງນັ້ນ ໃນໄລຍະການດຳເນີນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ມີປະຊາຊົນບັນດາເຜົ່າສົ່ງຄຳຄິດເຫັນຜ່ານໂທລະສັບສາຍດ່ວນ (156) ຫຼາຍກ່ວາ 479 ສາຍ ເຊີ່ງສາມາດສັງລວມໄດ້ເປັນ 72 ບັນຫາ ໃນນີ້ບັນຫາທີ່ພົ້ນເດັ່ນແມ່ນພົວພັນເຖີງຄ່າໄຟຟ້າແພງ, ບັນຫາທີ່ດິນ, ການກໍສ້າງເສັ້ນທາງ, ການຄຸ້ມຄອງແລກປ່ຽນເງິນຕາ, ການແກ້ໄຂບັນຫາຢາເສບຕິດ ແລະ ການປະຕິບັດຄຳຕັດສິນຂອງສານ

(ຂ່າວ: ເມືອງກາສີ)

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031