Thu. Oct 22nd, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ກອງປະຊຸມ ອົມຮົມ ການເມືອງ-ແນວຄິດໃຫ້ແກ່ພະນັກງານບຳນານ ທົ່ວເມືອງວັງວຽງ

1 min read

ໃນວັນທີ 20 ທັນວາ 2019 ຜ່ານມານີ້, ຢູ່ທີ່ສະໂມສອນ ຂອງຫ້ອງວ່າການປົກຄອງເມືອງ ວັງວຽງ ແຂວງວຽງຈັນ, ໄດ້ຈັດກອງປະຊຸມ ອົມຮົມ ການເມືອງ-ແນວຄິດໃຫ້ແກ່ພະນັກງານບຳນານ ທົ່ວເມືອງວັງວຽງຂຶ້ນຢ່າງເປັນທາງການ.

ໂດຍການເປັນກຽດເຂົ້າຮ່ວມ ຂອງທ່ານ ຄຳພັນ ສິດທິດຳພາ ກຳມະການສູນກາງພັກ-ເລຂາພັກແຂວງ ເຈົ້າແຂວງໆວຽງຈັນ, ມີທ່ານ ຈັນແປງ ດວງພະຈັນ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ, ມີທ່ານ ຄຳຜອງ ດວງວິໄລ ກຳມະການພັກເມືອງ ເຈົ້າເມືອງໆວັງວຽງ, ມີບັນດາທ່ານຫົວຫນ້າຫ້ອງການ, ອາດີດການນຳຂອງເມືອງ, ພະນັກງານບຳນານທົ່ວເມືອງວັງວຽງເຂົ້າຮ່ວມ.

ທ່ານ ຈັນແປງ ດວງພະຈັນ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ຂຶ້ນຜ່ານບັນດາເອກະສານ ເພື່ອເປັນການທົບທວນຄືນກ່ຽວກັບຖານະບົດບາດ, ພັນທະ,ໜ້າທີ່ຂອງພະນັກງານບຳນານວ່າ :  ພະນັກງານບຳນານມີບົດບາດສໍາຄັນທີ່ສຸດຢູ່ໃນສັງຄົມລາວ, ເຊິ່ງພວກເຮົາບໍ່ອາດຈະຫຼົງລືມໄດ້ ໃນຫຼາຍສິບປີມານີ້ ພວກເພິ່ນແມ່ນໄດ້ປະກອບສ່ວນຢ່າງສົມກຽດ ເຂົ້າໃນພາລະກິດຕໍ່ສູ້ກູ້ຊາດ ກໍ່ຄື ພາລະກິດປົກປັກຮັກສາ ແລະ ສ້າງສາປະເທດຊາດ, ສຶກສາອົບຮົມລູກຫຼານ, ຄົນຮຸ່ນຫນຸ່ມໃຫ້ມີທັດສະນະຫຼັກຫມັ້ນການເມືອງທີ່ຫນັກແຫນ້ນ, ມີຄຸນສົມບັດສິນທໍາປະຕິວັດ, ມີນໍ້າໃຈສາມັກຄີ ເອື້ອເຟື້ອ ເພື່ອແຜ່ຊ່ວຍເຫຼືອເຊິ່ງກັນ ແລະ ກັນ, ຮັກສາມູນເຊື້ອ ແລະ ວັດທະນະທໍາອັນດີງາມຂອງຊາດ ຕິດພັນ ກັບການປົກປັກຮັກສາລະບອບໃຫມ່.

ພະນັກງານບໍານານແມ່ນຊັ້ນຄົນຫນຶ່ງ ທີ່ເຄີຍມີບົດບາດອິດທິພົນສູງ ແລະ ມີຊື່ສຽງຮຽງນາມ ໂດ່ງດັງໃນຂອບເຂດທົ່ວປະເທດ ຫຼື ໃນຂອບເຂດທ້ອງຖິ່ນໃດທ້ອງຖິ່ນຫນຶ່ງ.ເຄີຍເປັນກໍາລັງແຮງທາງດ້ານການເມືອງ, ເປັນຄັນທຸງ ແລະ ເປັນແບບຢ່າງວິລະກໍາໃນດ້ານຕ່າງໆ ແລະ ຜ່ານພຶດຕິກໍາຕົວຈິງ ໄດ້ສະສົມບົດຮຽນແຫ່ງຊີວິດ ແລະ ວຽກງານອັນປະເສີດເລີດລໍ້າປະໄວ້ໃຫ້ແກ່ຄົນຮຸ່ນຫຼັງ.

ປະຈຸບັນ ພວກເພິ່ນກໍ່ຍັງເປັນຫ່ວງ ເປັນໄຍຕໍ່ອະນາຄົດ ແລະ ຊາຕາກໍາຂອງປະເທດຊາດ ແລະ ຄົນຮຸ່ນເກີດໃຫມ່ໃຫຍ່ລຸນຕະຫຼອດ ເວລາ, ດັ່ງນັ້ນ ໃນໄລຍະຜ່ານມາ ກໍ່ຄືປະຈຸບັນ ບັນດາທ່ານທັງຫຼາຍເຫຼົ່ານັ້ນ ຈຶ່ງໄດ້ອອກແຮງສຶກສາ ອົບຮົມ ແລະ ປະກອບສ່ວນຖ່າຍທອດບົດຮຽນຂອງເພິ່ນໃຫ້ແກ່ຮຸ່ນສືບທອດຢ່າງບໍ່ຮູ້ອິດຮູ້ເມື່ອຍ. ໃນດ້ານອື່ນ ເພິ່ນຍັງເປັນແບບຢ່າງທາງການກະທໍາຕົວຈິງ ເຊັ່ນ: ເປັນທີ່ປຶກສາຂອງຄະນະພັກ, ອໍານາດການປົກຄອງ ແລະ ປະຊາຊົນບັນດາເຜົ່າ, ປະກອບສ່ວນເຂົ້າຮ່ວມໃນການໄກ່ເກ່ຍບັນຫາ ທີ່ບໍ່ດີ ຫຼື ສິ່ງຫຍໍ້ທໍ້ຕ່າງໆ ທີ່ເກີດຂຶ້ນຢູ່ໃນສັງຄົມ.

ທ່ານ ຄຳຜອງ ດວງວິໄລ ກຳມະການພັກແຂວງ-ເລຂາພັກເມືອງ ເຈົ້າເມືອງໆວັງວຽງ ຍັງໄດ້ໃຫ້ກຽດຜ່ານບາງເນື້ອໃນຈິດໃຈມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກວ່າ: ຜົນສໍາເລັດອັນສໍາຄັນ ແລະ ເປັນພື້ນຖານກວ່າຫມູ່ ແມ່ນຄວາມເປັນເອກະລາດ, ອໍານາດ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ໄດ້ຮັບການປົກປັກຮັກສາໄວ້ຢ່າງຫມັ້ນຄົງ, ລະບອບປະຊາທິປະໄຕປະຊາຊົນ ມີສະຖຽນລະພາບອັນຫນັກແຫນ້ນ, ສັງຄົມມີຄວາມ ສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ.

ເສດຖະກິດແຫ່ງຊາດໄດ້ຂະຫຍາຍຕົວ ດ້ວຍຈັງຫວະໄວ, ຕໍ່ເນື່ອງ ແລະ ດໍາເນີນໄປຢ່າງຖືກທິດ, ໃນທ່າມກາງທີ່ເສດຖະກິດຂອງໂລກ ຫົດຖອຍ, ຈັງຫວະເຕີບໂຕບັນລຸຕາມຄາດຫມາຍທີ່ວາງໄວ້ ສະເລ່ຍໃນ 5 ປີ ບັນລຸ 7,9 % ລວມຍອດ ມູນຄ່າຜະລິດຕະພັນພາຍໃນ ໃນປີ 2014 – 2015 ປະມານ 102.320 ຕື້ກີບ ( 12,8 ຕື້ໂດລາ ). ຂົງເຂດວັດທະນະທໍາ-ສັງຄົມ ໄດ້ຮັບການຂະຫຍາຍຕົວທັງໃນດ້ານປະລິມານ ແລະ ຄຸນນະພາບ. ລະບົບການເມືອງຂອງລະບອບປະຊາທິປະໄຕປະຊາຊົນ ໄດ້ຮັບການປັບປຸງບູລະນະໃຫ້ມີ ຄວາມຫນັກແຫນ້ນ, ເຂັ້ມແຂງ.

ພັກເຮົາ ໄດ້ເປັນເຈົ້າການໃນການຊີ້ນໍາເຄື່ອນໄຫວວຽກງານຕ່າງປະເທດຢ່າງຕັ້ງຫນ້າ ອັນໄດ້ ປະກອບສ່ວນສໍາຄັນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ກໍຄື ການເສີມ ສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາຢູ່ພາກພື້ນ ແລະ ໃນໂລກ, ປີ 2015 ປະເທດເຮົາໄດ້ມີການພົວພັນການທູດກັບ 138 ປະເທດ ແລະ ມີການພົວພັນດ້ານ ພັກກັບເກືອບ 130 ພັກການເມືອງໃນໂລກ.  ໄດ້ສືບຕໍ່ປັບປຸງກໍ່ສ້າງຕົນເອງ ທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນການນໍາພາ; ໄດ້ເປັນເຈົ້າການໃນການວາງແນວທາງການຈັດຕັ້ງປະຕິບັດຢ່າງສອດຄ່ອງ.

ຕອນທ້າຍ ທ່ານ ຄຳພັນ ສິດທິດຳພາ ເຈົ້າແຂວງ ວຽງຈັນ ຍັງໄດ້ໃຫ້ກຽດໂອ້ລົມ ພ້ອມທັງໄດ້ຍ້ອງຍໍຊົມເຊີຍ ບັນດາພະນັກງານ ທີ່ໄດ້ມີຜົນງານປະກອບສ່ວນເຂົ້າໃນພາລະກິດຕໍ່ສູ້ກູ້ຊາດ ກໍ່ຄື ພາລະກິດປົກປັກຮັກສາ ແລະ ສ້າງສາປະເທດຊາດ ທັງເປັນແກ່ນສານຂອງການເຕົ້າໂຮມຄວາມສາມັກຄີ ເປັນແບບຢ່າງໃຫ້ຄົນຮຸ່ນເກີດໃຫມ່ໃຫຍ່ລຸນ ເປັນທີ່ປຶກສາຂອງຄະນະພັກ, ອໍານາດການປົກຄອງ ແລະ ປະຊາຊົນບັນດາເຜົ່າ.

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031