Tue. Sep 29th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ສຳເລັັດກອງປະຊຸມແລກປ່ຽນບົດຮຽນການແກ້ໄຂປະກົດການຫຍໍ້ທໍ້ໃນສັງຄົມ

1 min read

ກອງປະຊຸມແລກປ່ຽນບົດຮຽນການແກ້ໄຂປະກົດການຫຍໍ້ທໍ້ໃນສັງຄົມ ສຳເລັດລົງຢ່າງສະງ່າງາມ

ໃນວັນທີ 9 ກັນຍາ 2020 ຜ່ານມານີ້ ກອງບັນຊາການ ປກສ ເມືອງວຽງຄໍາ ແຂວງວຽງຈັນ ໄດ້ຈັດກອງປະຊຸມແລກປ່ຽນບົດຮຽນການແກ້ໄຂປະກົດການຫຍໍ້ທໍ້ຂື້ນ ຢູ່ທີ່ສະໂມສອນຫ້ອງວ່າການປົກເມືອງວຽງຄໍາ

ໂດຍການເຂົ້າຮ່ວມຂອງທ່ານ ພອນແກ້ວ ຂຸນພົນ ເຈົ້າເມືອງໆວຽງຄໍາ , ທ່ານ ພັທ ຄໍາຟອງ ວົງດາແສນ ຮອງຫົວໜ້າກອງບັນຊາການ ປກສ ແຂວງ, ທ່ານ ພັທ ບຸນເສີດ ໄຊຍະສານ ຫົວໜ້າກອງບັນຊາການ ປກສ ເມືອງ, ທ່ານ ພັທ ບົວທອງ ບໍລິບານ ຫົວໜ້າຫ້ອງຕໍາຫຼວດ ປກສ ແຂວງ, ມີແຂກຖຶກເຊີນ, ເລຂາພັກບ້ານ, ນາຍບ້ານອ້ອມຂ້າງ ພ້ອມດ້ວຍພະນັກງານ-ນັກຮົບເຂົ້າຮ່ວມ.


ທ່ານ ພັຕ ຍຸງຄໍາ ສອນສິດຍະລາດ ຮອງຫົວໜ້າກອງບັນຊາການ ປກສ ເມືອງວຽງຄໍາ ກ່າວວ່າ: ບັນຫາປະກົດການຫຍໍ້ທໍ້ໃນສັງຄົມໄດ້ເກີດຂື້ນດ້ວຍຫຼາຍຮູບແບບເຊັ່ນ: ການກໍ່ເຫດລັກຊັບ, ສໍ້ໂກງຊັບ, ຫຼິ້ນການພະນັນ, ຄ້າໂສເພນີ, ອາລະວາດຕິກັນ, ຄ້າຂາຍຢ່າເສບຕິດ, ບັນຫາອຸປະຕິເຫດຕາມທ້ອງຖະໜົນຫຼວງ, ບັນຫາກຸ່ມແກ້ງໄວລຸ້ນຂີ່ລົດກວນເມືອງ ແລະ ອື່ນໆ ສະແດງອອກ ໃນປີຜ່ານມາ ມີຄະດີເກີດຂື້ນທັງໝົດ 150 ເລື່ອງ ຜູ້ຖືກຫາ 59 ຄົນ, ຍິງ 2 ຄົນ,

ມີຄະດີອາຍາເກີດຂື້ນ 47 ເລື່ອງ ຜູ້ຖືກຫາ 44 ຄົນ ຍິງ 1 ຄົນ, ສາມາດເກັບກູ້ຂອງກາງຄະດີໄດ້ມີ: ລົດຈັກ 7 ຄັນ, ເຮືອ 1 ລໍາ, ປື່ນດັດແປງສະພາບ 2 ກະບອກ, ໂທລະສັບ 4 ໜ່ວຍ, ພັດລົມ 1 ໜ່ວຍ, ຈັກໄພເບີ່ 1 ເຄື່ອງ, ວິທະຍຸ 1 ໜ່ວຍ, ລວມມູນຄ່າເສຍຫາຍທັງໝົດ 77.050.000 ກີບ, ຄະດີຢາເສບຕິດເກີດຂື້ນທັງໝົດ 10 ເລື່ອງ ຜູ້ຖຶກຫາ 15 ຄົນ ຍິງ 1 ຄົນ, ຢຶດຂອງກາງຄະດີຢາບ້າ ຈໍານວນ 348 ເມັດ, ມີອຸປະຕິເຫດເກີດຂຶ້ນທັງໝົດ 93 ເລື່ອງ, ມີຜູ້ປະສົບອຸປະຕິເຫດທັງໝົດ 129 ຄົນ, ຍິງ 49 ຄົນ, ບາດເຈັບເລັກນ້ອຍ 93 ຄົນ, ຍິງ 36 ຄົນ, ບາດເຈັບສົມຄວນ 28 ຄົນ, ບາດເຈັບສາຫັດ 4 ຄົນ, ເສຍຊີວິດ 4 ຄົນ, ພາຫະນະເປ່ເພ 161 ຄັນ, ເປ່ເພເລັກນ້ອຍ 102 ຄັນ, ເປ່ເພສົມຄວນ 93 ຄັນ, ມູນຄ່າເສຍຫາຍທັງໝົດ 487.000.000 ກີບ ແລະ ວຽກງານອື່ນໆອິກ, ກໍ່ໄດ້ເອົາໃຈໃສ່ເຮັດສໍາເລັດໜ້າທີ່, ໄລຍະຜ່ານມາພວກເຮົາໄດ້ເອົາໃຈໃສ່ສຶກສາອົບຮົມການເມືອງນຳພາແນວຄິດ ໃຫ້ແກ່ພະນັກງານ-ນັກຮົບ

ຢ່າງເປັນປົກກະຕິເຮັດໃຫ້ພະນັກງານ-ນັກຮົບ ມີຄຸນທາດການເມືອງໜັກແໜ້ນ, ມີຄວາມຮັບຮູ້ຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຫ້າວຫັນຕໍ່ໜ້າທີ່ວຽກງານສາມາດຍາດໄດ້ຜົນງານຫຼາຍດ້ານ ສະເພາະທິດທາງແຜນການໃນຕໍ່ໜ້າ ຈະໄດ້ສືບຕໍ່ເຮັດວຽກງານການເມືອງແນວຄິດໃຫ້ແກ່ພະນັກງານ-ນັກຮົບ ໃຫ້ມີຄວາມເຂົ້າໃຈແຈ້ງຕໍ່ກັບໜ້າທີ່ຂອງຕົນ ກຳໃຫ້ໄດ້ແນວທາງນະໂຍບາຍຂອງພັກ ລະບຽບກົດໝາຍຂອງລັດ, ຫຼັກການວິຊາສະເພາະຂອງຕົນສຸມເຫື່ອແຮງສະຕິປັນຍາເຂົ້າໃນການເຮັດໜ້າທີ່ດ້ວຍຄວາມເອົາໃຈໃສ່ສູງ ກ້າເຮັດກ້າຄິດກ້າຮັບຜິດຊອບ,

ເອົາໃຈໃສ່ເຮັດວຽກງານໂຄສະນາເຮັດໃຫ້ປະຊາຊົນຮູ້ໄດ້ຜົນຮ້າຍ ເລ່ລ່ຽມກົນອຸບາຍຂອງຄົນບໍ່ດີ, ຜູ້ກະທຳຜິດ, ຜູ້ຕ້ອງໂທດຕ່າງໆໃຫ້ມີສະຕິລະວັງຕົວ ເປັນຫູເປັນຕາຊ່ວຍເຈົ້າໜ້າທີ່ເຮັດໃຫ້ວຽກງານປ້ອງກັນຊາດ-ປ້ອງກັນຄວາມສະຫງົບ ເປັນໜ້າທີ່ຂອງທົ່ວປວງຊົນ, ຕ້ອງເຮັດວຽກງານສືບຂ່າວກຳສະພາບການໃຫ້ແໜ້ນ ໂດຍມີການປະສານສົມທົບກັບພາຍນອກພາຍໃນໃຫ້ຕີລາຄາສະພາບການເຄື່ອນໄຫວຂອງສັດຕູ ແລະ ກຸ່ມຄົນບໍ່ຫວັງດີບັນດາໜໍ່ແໜງປະກົດການຫຍໍ້ທໍ້ຕ່າງໆທີ່ເກີດຂຶ້ນໃຫ້ຊັດເຈນ ເພື່ອສະກັດກັ້ນ ແລະ ແກ້ໄຂໃຫ້ທັນເວລາ,

ຕ້ອງກຳແໜ້ນບັນດາພື້ນທີ່, ຈຸດຫຼໍ່ແຫຼມ, ບັນດາເປົ້າໝາຍຕ່າງໆທີ່ມີຄວາມສ່ຽງສູງຕໍ່ຄວາມບໍ່ສະຫງົບ ແລະ ຄວາມເປັນລະບຽບຮຽບຮ້ອຍເກີດຂື້ນໃນສັງຄົມປັບປຸງແກ້ໄຂບັນດາດ້ານອ່ອນຂໍ້ຄົງຄ້າງທີ່ເຮັດບໍ່ທັນໄດ້ດີໃຫ້ນັບມື້ນັບດີຂື້ນກວ່າເກົ່າ. ພ້ອມນັ້ນໃນກອງປະຊຸມຍັງໄດ້ພັດປ່ຽນກັນຂື້ນປະກອບຄຳຄິດຄຳເຫັນຢ່າງກົງໄປກົງມາແບບວິທະຍາສາດ ເພື່ອພ້ອມກັນຊອກຫາວິທີສະກັດກັ້ນ ແລະ ແກ້ໄຂປະກົດການຫຍໍ້ທໍ້ດ້ານຕ່າງໆໃຫ້ຄ່ອຍໆໝົດໄປ.


ຕອນທ້າຍກອງປະຊຸມຍັງໄດ້ຮັບຝັງການໂອລົມຂອງທ່ານ ພອນແກ້ວ ຂຸນພົນ ເຈົ້າເມືອງໆວຽງຄໍາ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນສຳເລັດກໍ່ຄືວຽກງານ ແລະ ໄຊຊະນະທີ່ບັນດາພະນັກງານ – ນັກຮົບ ຍາດມາໄດ້ໃນໄລຍະຜ່ານມາ ພ້ອມນັ້ນຍັງໄດ້ຍົກໃຫ້ເຫັນບາງສະພາບປະກົດການຫຍໍ້ທໍ້ທີ່ເກີດຂື້ນຢູ່ໃນສັງຄົມປະຈຸບັນ ທີ່ພົວພັນເຖິງເຈົ້າໜ້າທີ່ຕ້ອງໄດ້ມີສະຕິ ແລະ ກຽມພ້ອມປະເຊີນໜ້າກັບບັນຫາດັ່ງກ່າວຈາກນັ້ນກໍ່ໄດ້ຮຽກຮ້ອງໃຫ້ບັນດາສະຫາຍຕ້ອງໄດ້ຮູ້ຈັກທີ່ຕັ້ງ ແລະ ພາລະບົດບາດຄວາມຮັບຜິດຊອບຂອງຕົນ ມີການປັບປຸງແບບແຜນວິທີເຮັດວຽກ, ແບບແຜນວິທີນຳພາໃຫ້ທັນສະໄໝ່ຂື້ນກວ່າເກົ່າ.

ພາບ-ຂ່າວ: ປກສ ແຂວງວຽງຈັນ, ທອງສີ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

September 2020
M T W T F S S
 123456
78910111213
14151617181920
21222324252627
282930