Thu. Oct 1st, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ກອງປະຊຸມຊຸກຍູ້ວຽກງານຂະບວນການ ຕ້ອນຮັບກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງວຽງຈັນ

1 min read

ກອງປະຊຸມຊຸກຍູ້ວຽກງານຂະບວນການ ຕ້ອນຮັບກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງວຽງຈັນ


ວັນທີ 11 ກັນຍາ 2020 ທີ່ຜ່ານມາ, ຢູ່ທີ່ສະໂມສອນໃຫຍ່ເມືອງຊະນະຄາມ ແຂວງວຽງຈັນ, ໄດ້ຈັດກອງປະຊຸມຊຸກຍູ້ວຽກງານຂະບວນການ ເພື່ອຕ້ອນຮັບກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງວຽງຈັນຂຶ້ນ,

ໂດຍພາຍໃຕ້ການເປັນປະທານ ຂອງທ່ານ ນາງ ອິ່ນຄໍາ ພັນດາລາ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ ແຂວງວຽງຈັນ ພ້ອມດ້ວຍບັນດາອະນຸກໍາມະການຂັ້ນແຂວງ,

ມີທ່ານ ສະໝານ ວິເສດຍະພົງສ໌ ເລຂາພັກເມືອງ ເຈົ້າເມືອງໆຊະນະຄາມ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ພະນັກງານຫຼັກແຫຼ່ງ, ລັດວິສະຫະກິດ ແລະ ບັນດາທຸລະກິດພາຍໃນເມືອງ ເຂົ້າຮ່ວມຢ່າງພ້ອມພຽງ.


ຈຸດປະສົງ ຂອງກອງປະຊຸມ ກໍ່ເພື່ອເປັນການລົງຕິດຕາມກວດກາ ແລະ ຕີລາຄາສະພາບການເຄື່ອນໄຫວ ການຈັດຕັ້ງປະຕິບັດວຽກງານຂອງບັນດາອະນຸກໍາມະການໂຄສະນາຂະບວນການຂັ້ນເມືອງ ແລະ ຂັ້ນຮາກຖານ; ເພື່ອສືບຕໍ່ຊຸກຍູ້ຂະບວນຂັ້ນຮາກຖານ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນ ເພື່ອປະກອບສ່ວນສ້າງຂະບວນການຕ້ອນຮັບກອງປະຊຸມໃຫຍ່ 3 ຂັ້ນໃຫ້ບັນລຸຕາມລະດັບຄາດໝາຍ ແລະ ເພື່ອເປັນການຊຸກຍູ້ການບັນດາອະນຸກໍາມະການຂັ້ນຮາກຖານ ໃນການເພີ່ມທະວີປຸກລະດົມຂະບວນການຢ່າງຮອບດ້ານ ເພື່ອຕ້ອນຮັບກອງປະຊຸມໃຫຍ່ຂອງອົງຄະນະພັກແຂວງວຽງຈັນ ໃຫ້ມີຂະບວນຟົດຟື້ນ.


ກອງປະຊຸມ ທ່ານ ສະໝານ ວິເສດຍະພົງສ໌ ເຈົ້າເມືອງຊະນະຄາມ ໄດ້ຂຶ້ນລາຍງານການຈັດຕັ້ງປະຕິບັດວຽກງານຮອບດ້ານໂດຍຫຍໍ້, ເຊິ່ງທ່ານໄດ້ຍົກໃຫ້ເຫັນສະພາບທີ່ຕັ້ງ ແລະ ຈຸດພິເສດຂອງເມືອງ ເປັນເມືອງທີ່ຕັ້ງຍຸດທະສາດດ້ານປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ ແລະ ວັດທະນະທໍາ-ສັງຄົມ, ເປັນເມືອງປ້ອມດ່ານໜ້າຂອງແຂວງວຽງຈັນ; ຜ່ານການຈັດຕັ້ງປະຕິບັດບັນດາຄາດໝາຍ ແລະ ທິດທາງແຜນວຽກຂອງມະຕິກອງປະຊຸມໃຫຍ່ຂອງເມືອງໃນໄລຍະຜ່ານມາ

ເມືອງຊະນະຄາມ ສາມາດຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດໄພ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ສະເລ່ຍລາຍຮັບຕໍ່ຫົວຄົນໄດ້ 1.793 ໂດລາສະຫະລັດ/ຄົນ/ປີ, ປະຊາຊົນມີມູນເຊື້ອດຸໝັ່ນໃນການຜະລິດ, ການລົງທຶນຂອງພາກລັດ, ເອກະຊົນ ແລະປະຊາຊົນ ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ.


ເພື່ອເປັນການສືບຕໍ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຂອງອົງຄະນະພັກແຕ່ລະຂັ້ນ ກໍ່ຄືແຜນພັດທະນາເສດຖະກິດ-ສັງຄົມໃຫ້ບັນລຸຕາມລະດັບຄາດໝາຍ, ແນໃສ່ໃນການສ້າງຂະບວນການຂໍານັບຮັບຕ້ອນກອງປະຊຸມໃຫຍ່ຂອງອົງຄະນະພັກແຂວງທີ່ຈະໄຂຂຶ້ນໃນຕໍ່ໜ້າ, ເມືອງໄດ້ວາງວິໃສທັດຕາມແລວພັດທະນາເສດຖະກິດການຄ້າ ແລະ ການລົງທຶນ 344, ໂດຍຖືເອົາການພັດທະນາກະສິກໍາ ຕິດພັນກັບອຸດສະຫະກໍາປຸງແຕ່ງ ເຊື່ອມໂຍງກັບການຄ້າຊາຍແດນ ແລະ ຫຼຸດພົ້ນອອກຈາກຄວາມທຸກຍາກ, ເພື່ອຮັບປະກັນ ເຮັດໃຫ້ເມືອງໄດ້ມີການພັດທະນາຢ່າງເຂັ້ມແຂງຮອບດ້ານ ແລະ ຍືນຍົງ, ເມືອງໄດ້ກໍານົດຈຸດໝາຍລວມ ແລະ ຄາດໝາຍສູ້ຊົນຄື: ເອົາໃຈໃສ່ເພີ່ມທະວີບົດບາດ ແລະ ຍົກສູງຄວາມສາມາດໃນການນໍາພາຂອງພັກ, ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ, ປຸກລະດົມກໍາລັງແຮງສັງລວມ,

ຄວາມອາດສາມາດບົ່ມຊ້ອນເພື່ອເຮັດໃຫ້ເສດຖະກິດມີການຂະຫຍາຍຕົວ, ສືບຕໍ່ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ, ສ້າງບ້ານພັດ ທະນາໃຫ້ເພີ່ມຂຶ້ນ, ສ້າງບ້ານຈຸດສຸມປ້ອງກັນຊາດ-ປ້ອງກັນຄວາມສະຫງົບໃຫ້ເຂັ້ມແຂງ, ຍົກສູງລະດັບວຽກງານທາງດ້ານວັດ ທະນະທໍາ-ສັງຄົມໃຫ້ມີສິດທິພາບ, ສົ່ງເສີມວັດທະນະທໍາທີ່ເປັນເອກະລັກ ແລະ ກ້າວໜ້າ, ປຸກລະດົມເພື່ອຍາດແຍ່ງແຫຼ່ງທຶນເຂົ້າໃນການພັດທະນາ, ເອົາໃຈໃສ່ເຂົ້າໃນວຽກງານສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ໃຫ້ນັບມື້ນັບຫຼຸດໜ້ອຍຖອຍລົງ ແລະ ສືບຕໍ່ປະຕິບັດມາດຕະການໃນ ການຄວບຄຸມຕ້ານການແຜ່ລະບາດພະຍາດ COVID-19 ໃຫ້ມີປະສິດທິພາບ.


ໃນຕອນທ້າຍຂອງກອງປະຊຸມ ຍັງໄດ້ຮັບຟັງການມີຄໍາເຫັນໂອ້ລົມ ແລະ ມີທິດຊີ້ນໍາຈາກທ່ານ ນາງ ອິ່ນຄໍາ ພັນດາລາ ເຊິ່ງທ່ານໄດ້ຮຽກຮ້ອງມາຍັງບັນດາຄະນະນໍາຂັ້ນເມືອງ, ບັນດາພະນັກງານຫຼັກແຫຼ່ງ, ວິສາຫະກິດ, ນັກທຸລະກິດ ຕະຫຼອດປະຊາຊົນບັນດາເຜົ່າພາຍໃນເມືອງ ຈົ່ງເປັນເຈົ້າການປະກອບສ່ວນຢ່າງຕັ້ງໜ້າ, ເປັນຂະບວນທີ່ຟົດຟື້ນກວ້າງຂວາງທົ່ວປວງຊົນ ແລະ ຮັບປະກັນໃຫ້ມີຄວາມສະຫງົບໃນທົ່ວສັງຄົມ.

ຂ່າວເມືອງຊະນະຄາມ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031