Sun. Oct 25th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

20 ຄອບຄົວຂອງເມືອງວຽງຄຳ ແຂວງວຽງຈັນ ຖືກຢັ້ງຢືນເປັນຄອບຄົວຕົວແບບດ້ານກະສິກຳ ແລະ ປ່າໄມ້

1 min read

20 ຄອບຄົວຂອງເມືອງວຽງຄຳ ແຂວງວຽງຈັນ ຖືກຢັ້ງຢືນເປັນຄອບຄົວຕົວແບບດ້ານກະສິກຳ ແລະ ປ່າໄມ້.


ພິທີມອບໃບຢັ້ງຢືນໃຫ້ຄອບຄົວຕົວແບບດ້ານກະສິກຳແລະ ປ່າໄມ້ຂອງເມືອງວຽງຄຳ ແຂວງວຽງຈັນ ໄດ້ຈັດຂຶ້ນໃນວັນທີ 8 ຕຸລາ 2020 ຢູ່ທີ່ຫ້ອງການບ້ານປາກແຈ້ງ,

ເປັນກຽດເຂົ້າຮ່ວມມີ ທ່ານ ພອນແກ້ວ ຂຸນພົນ ເຈົ້າເມືອງໆວຽງຄຳ, ທ່ານ ພູວົງ ບຸນຊູ ຫົວໜ້າພະແນກກະສິກຳ ແລະ ປ່າໄມ້ ແຂວງວຽງຈັນ, ມີຫ້ອງການກ່ຽວຂ້ອງຂອງເມືອງ, ມີນາຍບ້ານ ແລະ ຄອບຄົວຕົວແບບດັ່ງກ່າວເຂົ້າຮ່ວມ.


ທ່ານ ຕຽງຄຳ ແສງສຸລິຈັນ ຫົວໜ້າຫ້ອງການກະສິກຳແລະ ປ່າໄມ້ເມືອງວຽງຄຳ ໄດ້ກ່າວໃນພິທີວ່າ: ຜ່ານມາມີຫຼາຍຄອບຄົວໄດ້ມີການພັດທະນາດີຂຶ້ນຢ່າງຕໍ່ເນືອງສາມາດເປັນຄອບຄົວຕົວແບບໄດ້ ແລະ ເປັນທີ່ຍອມຮັບຂອງສັງຄົມ, ດັ່ງນັ້ນຫ້ອງການກະສິກຳ ແລະ ປ່າໄມ້ເມືອງວຽງຄຳ ຈຶ່ງໄດ້ຈັດຕັ້ງປະຕິບັດປະເມີນຄອບຄົວຕົວແບບຕາມເງື່ອນໄຂ ແລະ ມາດຖານຂອງຂໍ້ຕົກລົງສະບັບເລກທີ 0837 / ກປ ວາງອອກ,

ຜົນການປະເມີນສາມາດສັງລວມໄດ້ວ່າ ມີ 20 ຄອບຄົວທີ່ປະຕິບັດບັນລຸໄດ້ຄົບຖ້ວນ 9 ມາດຖານຄື: ມີເຮືອນຢູ່ຖາວອນ, ດິນທຸກຕອນມີໃບຢັ້ງຢືນສິດນຳໃຊ້ທີ່ດິນຕາມລະບຽບການມີການນຳໃຊ້ເຂົ້າໃນການຜະລິດກະສິກຳຕະຫຼອດປີ,ສິ່ງປູກສ້າງຕ່າງໆ

ໄດ້ຈັດສັນໃຫ້ມີຄວາມເປັນລະບຽບຮຽບຮ້ອຍສະດວກປອດໄພ,ສາມາດນໍາໃຊ້ແຫລ່ງນ້ຳເຂົ້າໃນການຜະລິດກະສິກໍາໄດ້ຕະຫຼອດປີ,ໄດ້ຮັບການສຶກສາຝຶກອົບຮົມດ້ານເຕັກນິກກະສິກໍາໃດໜຶ່ງ,ມີການຜະລິດກະສິກຳແບບປະສົມປະສານຕິດພັນກັບການອະນຸລັກສະພາບແວດລ້ອມໃນລະດັບຄອບຄົວໄດ້ດີ, ໄດ້ເຂົ້າຮ່ວມກຸ່ມຜູ້ຊົມໃຊ້ນ້ຳຊົນລະປະທານກຸ່ມຜະລິດກະສິກກະສິກໍາແລະປ່າໄມ້,

ໄລຍະ 3 ປີ ຜ່ານມາໄດ້ເຮັດການຜະລິດກະສິກຳຕະຫຼອດປີ ຢ່າງຕໍ່ເນື່ອງ ແລະ ມີຜົນກຳໄລທຸກໆປີ, ມີລາຍຮັບສະເລ່ຍ ສູງກວ່າ 900 ໂດລາຕໍ່ຄົນຕໍ່ປີ, ມີບົດຮຽນ ແລະ ປະສົບການດີ, ມີການພັດທະນາຕົນເອງສາມາດຖ່າຍທອດຄວາມຮູ້ ແລະ ບົດຮຽນໃຫ້ຄອບຄົວອື່ນໄດ້.

ໃນ 20 ຄອບຄົວນີີ້ ມີສະມາຊິກທັງໝົດ 109 ຄົນ ຍິງ 59 ຄົນ, ໃນໄລຍະ 3 ປີ ຜ່ານມາ ມີລາຍຮັບ ທັງໝົດ 12 ຕື້ກວ່າກີບ.ໃນນີ້ຖືກຢັ້ງຢືນເປັນຄອບຄົວຕົວແບບ ດ້້້ານການລ້ຽງງົວ 6 ຄອບຄົວ,ຕົວແບບ ດ້ານການລ້ຽງໝູ 2 ຄອບຄົວ, ຕົວແບບ ດ້ານກະສິກຳປະສົມປະສານ 2 ຄອບຄົວ,ຕົວແບບ ດ້ານການປູກໝາກກ້ຽງໃຫຍ່ 2 ຄອບຄົວ, ຕົວແບບ ດ້ານການປູກເຂົ້າ 4 ຄອບຄົວ,ຕົວແບບ ດ້ານການປູກພຶດຜັກ 2 ຄອບຄົວ ແລະຕົວແບບ ດ້ານການປູກໄຜ່ລ້ຽງນ້ອງ 1 ຄອບຄົວ.

 

 

 

ເປັນກຽດມອບໃບຢັ້ງຢືນໃຫ້ຄອບຄົວຕົວແບບດ້ານກະສິກຳແລະປ່າໄມ້ຂອງເມືອງວຽງຄຳແຂວງວຽງຈັນປະຈຳປີ2020ຄັ້ງນີ້ໂດຍແມ່ນທ່ານພອນແກ້ວຂຸນພົນເຈົ້າເມືອງໆວຽງຄຳ.

ຂ່າວ:ບຸນມາແກ້ວບຸດດາ.

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031