Sun. Oct 25th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ກອງປະຊຸມຊຸກຍູ້ວຽກງານອຸດສະຫະກໍາ ແລະ ການຄ້າ

1 min read

ກອງປະຊຸມຊຸກຍູ້ວຽກງານອຸດສະຫະກໍາ ແລະ ການຄ້າ
ໃນວັນທີ 9 ຕຸລາ 2020 ທີ່ຜ່ານມາ, ຢູ່ທີ່ສະໂມສອນໃຫຍ່ຂອງເມືອງຊະນະຄາມ ແຂວງວຽງຈັນ ໄດ້ຈັດກອງປະຊຸມຊຸກຍູ້ວຽກງານອຸດສະຫະກໍາ ແລະ ການຄ້າຂຶ້ນ,

ໂດຍພາຍໃຕ້ການເປັນປະທານຮ່ວມຂອງທ່ານ ບຸນຊ່ວງ ວັນສີ ຄະນະປະຈໍາພັກເມືອງ ຮອງເຈົ້າເມືອງຊະນະຄາມ ແລະ ທ່ານ ໄພວັນ ປະຖັມມະວົງ ຫົວໜ້າພະແນກອຸດສະຫະກໍາ ແລະ ການຄ້າແຂວງວຽງຈັນ, ມີບັນດາພະແນກການຂັ້ນແຂວງ, ບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ພະນັກງານ-ລັດຖະກອນ, ລັດວິສະຫະກິດ ແລະ ບັນດາຫົວໜ່ວຍທຸລະກິດພາຍໃນເມືອງ ເຂົ້າຮ່ວມຢ່າງພ້ອມພຽງ.


ຈຸດປະສົງ ກໍ່ເພື່ອເປັນການຊຸກຍູ້ສົ່ງເສີມ ກ່ຽວກັບພາລະບົດບາດ, ໜ້າທີ່, ຂອບເຂດສິດ, ໂຄງປະກອບການຈັດຕັ້ງ,ຫຼັກການ ແລະ ແບບແຜນວິທີເຮັດວຽກ ເພື່ອເປັນບ່ອນອີງໃຫ້ແກ່ການຈັດຕັ້ງ ແລະ ການເຄື່ອນໄຫວຂອງວຽກງານອຸດສະຫະກໍາ ແລະ ການຄ້າ, ແນໃສ່ເພື່ອຜັນຂະຫຍາຍບັນດານະໂຍບາຍຂອງພັກ ແລະ ລັດຖະບານ ໃນການຄຸ້ມຄອງ, ພັດທະນາວຽກງານ, ຕິດຕາມຊຸກຍູ້ຄວາມຮັບຜິດຊອບ, ແນໃສ່ເຮັດໃຫ້ການປະສານງານລະຫວ່າງພາກລັດ ແລະ ພາກທຸລະກິດໃຫ້ມີເງື່ອນໄຂສະດວກ ແລະ ມີຄວາມເປັນເອກະພາບກັນໃນຂອບເຂດທົ່ວປະເທດ.


ທັງນີ້ ກໍ່ເພື່ອເປັນການປັບປຸງບັນຍາກາດໃນການດໍາເນີນທຸລະກິດຢູ່ ສປປລາວ ໃຫ້ມີຄວາມເຂັ້ມແຂງ ແນໃສ່ຍາດແຍ່ງ ແລະ ດຶງດູດການລົງທຶນທີ່ມີຄຸນນະພາບ, ຄວາມອາດສາມາດໃນການແຂ່ງຂັນ, ຫຼຸດຜ່ອນຄວາມກ້າວກະໂດດຂອງການເຄື່ອນໄຫວທຸລະກິດ, ປັບປຸງຂັ້ນຕອນ ແລະ ເວລາໃນການປະສານງານໃຫ້ມີຄວາມວ່ອງໄວ, ໂປ່ງໃສ່, ມີຜົນສັກສິດ, ສ້າງຄວາມເຊື່ອໝັ້ນໃຫ້ການຄຸ້ມຄອງ, ສ້າງທ່າແຮງໃນການຂະຫຍາຍທຸລະກິດໃຫ້ມີການຂະຫຍາຍຕົວ

ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃຫ້ບັນລຸຄາດໝາຍທີ່ວາງໄວ້ ແລະ ເປັນທ່າແຮງພື້ນຖານທີ່ສໍາຄັນຂອງເສດຖະກິດແຫ່ງຊາດຢ່າງໜັກແໜ້ນ, ໝັ້ນທ່ຽງ, ຕາມທິດຍືນຍົງ ແລະ ສີຂຽວ.
ເຊິ່ງກອງປະຊຸມໃນຄັ້ງນີ້ ຍັງໄດ້ເປີດໂອກາດໃຫ້ບັນດາແຂກ ທີ່ເປັນຜູ່ແທນກອງປະຊຸມໄດ້ປະກອບຄໍາຄິດ-ຄໍາເຫັນ ແລະ ແລກປ່ຽນບັນຫາທີ່ເປັນຂໍ້ຄົງຄ້າງ

ເພື່ອພ້ອມກັນຄົ້ນຄວ້າ ແລະ ແກ້ໄຂເພື່ອຊອກຫາທາງອອກດ້ວຍຄວາມເປັນເອກະພາບສູງ, ພ້ອມດຽວກັນນີ້ ໃນກອງປະຊຸມ ຍັງຮັບການເຊື່ອມຊຶມເອກະສານສໍາຄັນຂອງວຽກງານອຸດສະຫະກໍາ ແລະ ການຄ້າ ເປັນຕົ້ນ: ເອກະສານຄໍາສັ່ງຂອງນາຍົກລັດຖະມົນຕີ ສະບັບເລກທີ 02/ນຍ, ລົງວັນທີ 01 ກຸມພາ 2018, ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດໍາເນີນທຸລະກິດ ຢູ່ ສປປລາວ, ຂໍ້ຕົກລົງຂອງລັດຖະມົນຕີວ່າການກະຊວງອຸດສະຫະກໍາ ແລະ ການຄ້າ, ສະບັບເລກທີ 0023/ອຄ.ກທຄວ, ລົງວັນທີ 09 ມັງກອນ 2019, ວ່າດ້ວຍ: ການຂຶ້ນທະບຽນວິສະຫະກິດ ແລະ ຂໍ້ຕົກລົງຂອງລັດຖະມົນຕີວ່າການກະຊວງອຸດສະຫະກໍາ ແລະ ການຄ້າ, ສະບັບເລກທີ 0926/ອຄ.ກທຄວ, ລົງວັນທີ 13 ມັງກອນ 2018, ວ່າດ້ວຍ: ການຈັດຕັ້ງ ແລະ ການເຄື່ອນໄຫວຂອງຫ້ອງການອຸດສະຫະກໍາ ແລະ ການຄ້າເມືອງ.

ຂ່າວ: ເມືອງຊະນະຄາມ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

October 2020
M T W T F S S
 1234
567891011
12131415161718
19202122232425
262728293031