Tue. Sep 29th, 2020

Viengchanh News

ຂ່າວວັນນີ້ ຂ່າວບັນເທີງ ຂ່າວກິລາ ຂ່າວລາວ ຂ່າວວຽງຈັນ

ກອງປະຊຸມຄົ້ນຄວ້າກໍານົດ, ຊັບຊ້ອນ ຈັດລຽງບັນດາໂຄງການແຜນຄາດຄະເນການລົງທຶນ 04 ແຫຼ່ງທຶນ

1 min read

ກອງປະຊຸມຄົ້ນຄວ້າກໍານົດ, ຊັບຊ້ອນ
ຈັດລຽງບັນດາໂຄງການແຜນຄາດຄະເນການລົງທຶນ 04 ແຫຼ່ງທຶນ
( ການລົງທຶນຂອງລັດ, ການລົງທຶນດ້ານການຊ່ວຍເຫຼືອລ້າ, ການລົງທຶນຂອງເອກະຊົນພາຍໃນ ແລະ ຕ່າງປະເທດ
ການລົງທຶນຂອງທະນາຄານ ແລະ ປະຊາຊົນ).
ວັນທີ 14 ມັງກອນ 2020 ນີ້, ຢູ່ທີ່ຫ້ອງປະຊຸມເມືອງຊະນະຄາມ ແຂວງວຽງຈັນ, ໄດ້ຈັດກອງປະຊຸມຄົ້ນຄວ້າກໍານົດ, ຊັບຊ້ອນ, ຈັດລຽງບັນດາໂຄງການແຜນຄາດຄະເນການລົງທຶນ 04 ແຫຼ່ງທຶນຂຶ້ນ, ໂດຍພາຍໃຕ້ການເປັນປະທານຂອງທ່ານ ສະໝານ ວິເສດຍະພົງສ໌ ເລຂາພັກເມືອງ ເຈົ້າເມືອງໆຊະນະຄາມ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຮອງຫົວໜ້າຫ້ອງການ, ກົມກອງອ້ອມຂ້າງ ແລະ ພະນັກງານວິຊາການເຂົ້າຮ່ວມ ຢ່າງພ້ອມພຽງ.
ທ່ານ ສະໝານ ວິເສດຍະພົງສ໌ ເລຂາພັກເມືອງ ເຈົ້າເມືອງໆຊະນະຄາມ ໄດ້ເປັນກຽດຂຶ້ນມີຄໍາເຫັນໂອລົ້ມ ຕໍ່ກອງປະຊຸມ, ເຊິ່ງໄລຍະຜ່ານມາຄະນະພັກແຕ່ລະສະໄໝ ໄດ້ເອົາໃຈໃສ່ໃນການກໍານົດແຜນພັດທະນາເສດຖະກິດ-ສັງຄົມ ຕິດພັນກັບວຽກງານແຜນການ ແລະ ການລົງທຶນ, ໂດຍໄດ້ກໍານົດກິດຈະກໍາໃນການຈັດຕັ້ງປະຕິບັດຢ່າງມີແຜນການ, ເຮັດໃຫ້ເມືອງຊະນະຄາມໄດ້ຮັບການພັດທະນາຢ່າງຕໍ່ເນື່ອງ ແລະ ຄຽງຄູ່ກັບດ້ານຕັ້ງໜ້າດັ່ງກ່າວ, ທ່ານຍັງໄດ້ຍົກໃຫ້ເຫັນດ້ານຄົງຄ້າງ ກ່ຽວກັບການກໍານົດແຜນການພັດທະນາເສດຖະກິດ-ສັງຄົມໃນໄລຍະຜ່ານມາ, ເວົ້າລວມເວົ້າສະເພາະ ດ້ານການລົງທຶນ ແມ່ນເລັງໃສ່ການລົງທຶນຂອງລັດ ແລະ ການຊ່ວຍເຫຼືອເປັນສ່ວນຫຼາຍ, ອັນໄດ້ເຮັດໃຫ້ບົດບາດການພັດທະນາ-ການຄຸ້ມຄອງ, ການສົ່ງເສີມການລົງທຶນຂອງເອກະຊົນ ຍັງບໍ່ທັນກວ້າງຂວາງ ແລະ ໜັກແໜ້ນ, ສົ່ງຜົນສະທ້ອນເຮັດໃຫ້ການລົງທຶນຂອງເອກະຊົນຢູ່ພາຍໃນເມືອງບໍ່ຂະຫຍາຍຕົວກວ້າງຂວາງ, ນັກທຸລະກິດຂະໜາດກາງ ແລະ ຂະໜາດນ້ອຍບໍ່ມີຄວາມເຂັ້ມແຂງ ແລະ ບໍ່ສາມາດກ້າວເຂົ້າເຖິງແຫຼ່ງທຶນ.
ໃນກອງປະຊຸມ ທ່ານ ບຸນໜາ ລັດຕະນະວົງ ວ່າການຫົວໜ້າຫ້ອງການແຜນການ ແລະ ການລົງທຶນເມືອງ ໄດ້ຍົກໃຫ້ເຫັນ ບັນດາໂຄງການໃນ 4 ແຫຼ່ງທຶນຂອງເມືອງ ເຊິ່ງລວມມີທັງໝົດ 298 ໂຄງການ, ລວມມູນຄ່າການລົງທຶນ 1.256,63 ຕື້ກີບ; ໃນນີ້ ສັງລວມການລົງທຶນຂອງລັດ ມີທັງໝົດ 256 ໂຄງການ, ລວມມູນຄ່າການລົງທຶນ 1.124,99 ຕື້ກີບສົມທຽບໃສ່ແຜນການຂອງຂັ້ນເທິງໃນໄລຍະໃໝ່ລວມມູນຄ່າ 138,22 ຕື້ກີບ, ເກີນແຜນທີ່ໄດ້ກໍານົດຈໍານວນ 986,77ຕື້ກີບ; ສັງລວມການລົງທຶນຂອງ ODA ( ການຊ່ວຍເຫຼືອ) ມີ 18 ໂຄງການ, ລວມມູນຄ່າການລົງທຶນ 2,58 ຕື້ກີບ, ສົມທຽບໃສ່ທິດຊີ້ນໍາຂອງຂັ້ນເທິງໃນໄລຍະໃໝ່ລວມມູນຄ່າ 150,79 ຕື້ກີບ, ເຫັນວ່າຫຼຸດແຜນການຂອງຂັ້ນເທິງໃນໄລຍະໃໝ່ຈໍານວນ 148,21 ຕື້ກີບ; ສັງລວມການລົງທຶນຂອງເອກະຊົນພາຍໃນ ແລະ ຕ່າງປະເທດ ມີທັງໝົດ 15 ໂຄງການ,ລວມມູນຄ່າ 110,09 ຕື້ກີບ, ສົມທຽບໃສ່ທິດຊີ້ນໍາຂອງຂັ້ນເທິງໃນໄລຍະໃໝ່ມູນຄ່າ 691,14 ຕື້ກີບ,ເຫັນວ່າຫຼຸດແຜນການທີ່ໄດ້ກໍານົດຈໍານວນ 581,05 ຕື້ກີບ; ສັງລວມການລົງທຶນຂອງທະນາຄານ ແລະ ປະຊາຊົນ ລວມມີ 9 ໂຄງການ, ລວມມູນຄ່າ 18,97 ຕື້ກີບ, ທຽບໃສ່ທິດຊີ້ນໍາໃນໄລຍະໃໝ່ ເທົ່າກັບ 276,45 ຕື້ກີບ, ເຫັນວ່າຫຼຸດແຜນການຂອງຂັ້ນກໍານົດອອກຈໍານວນ 257,48 ຕື້ກີບ.


ເພື່ອຮັບປະກັນເຮັດໃຫ້ວຽກງານດັ່ງກ່າວໄດ້ຮັບການປັບປຸງ ແລະ ແກ້ໄຂໃຫ້ສອດຄ່ອງກັບສະພາບຄວາມຮຽກຮ້ອງຕ້ອງການໃນການພັດທະນາຂອງທ້ອງຖິ່ນ, ທ່ານເຈົ້າເມືອງ ໄດ້ຮຽກຮ້ອງມາຍັງບັນດາອະນຸກໍາມະການ ແລະ ວິຊາການຫ້ອງການທີ່ກ່ຽວຂ້ອງ, ພ້ອມກັນເອົາໃຈໃສ່ຄົ້ນຄວ້າ-ປຶກສາຫາລື, ເຕົ້າໂຮມບັນດາມັນສະໝອງເຂົ້າໃນການຈັດລຽງບູລິມະສິດວຽກງານໂຄງການແຕ່ລະຂະແໜງການໃຫ້ມີຄວາມຖືກຕ້ອງ ແລະ ສອດຄ່ອງ, ເພື່ອຮັບໃຊ້ໃຫ້ແກ່ແຜນພັດທະນາເສດຖະ ກິດ-ສັງຄົມຂອງເມືອງ ແລະ ກ້າວໄປເຖິງການຍາດແຍ່ງການລົງທຶນຂອງບັນດາໂຄງການຕ່າງໆຢູ່ພາຍໃນເມືອງ ໃຫ້ຫຼາຍຂຶ້ນ.
ເຊິ່ງກອງປະຊຸມ ຈະໄດ້ພ້ອມກັນຄົ້ນຄວ້າປຶກສາຫາລື ແລະເປັນເອກະພາບໃນການຈັດລຽງໂຄງການໃນ 4 ແຫຼ່ງທຶນຄືນໃໝ່, ເພື່ອເຮັດໃຫ້ມູນຄ່າການລົງທຶນຂອງແຕ່ລະໂຄງການມີຄວາມເໝາະສົມ, ສອດຄ່ອງກັບການກໍານົດຂອງຂັ້ນເທິງ, ຖືກຕ້ອງກັບຄວາມເປັນຈິງຂອງທ້ອງຖິ່ນ, ຮັບປະກັນໃຫ້ມີຄວາມເຂົ້າໃຈ ແລະ ເປັນເອກະພາບກັນລະຫວ່າງບັນດາຫ້ອງການພາຍໃນເມືອງ ຜູ່ເປັນເຈົ້າຂອງໂຄງການ ແລະ ອະນຸກໍາມະການເນື້ອໃນຂັ້ນເມືອງ; ທັ້ງນີ້ ກໍ່ເພື່ອພ້ອມກັນພັດທະນາເມືອງຊະນະຄາມໃຫ້ມີການຂະຫຍາຍຕົວຢ່າງຕໍ່ເນື່ອງ.


ຂ່າວ: ເມືອງຊະນະຄາມ

ສະແດງຄວາມຄິດເຫັນ

Leave a Reply

Your email address will not be published. Required fields are marked *

ປະຕິທິນ

September 2020
M T W T F S S
 123456
78910111213
14151617181920
21222324252627
282930